ԵՐԵՎԱՆ, 26 սեպտեմբերի — Sputnik. Ռուսաստանի հարավի հայ գործարարները մտածում են հայկական ապրանքների համար լոգիստիկ կենտրոն կառուցելու մասին։ Այդ մասին Sputnik Արմենիայի թղթակցին ասաց Ռուսաստանում Հայաստանի առևտրային ներկայացուցիչ Կարեն Ասոյանը։
Լոգիստիկ հանգույցների գաղափարի մասին վերջերս հայտարարել է Ռուսաստանում Հայաստանի դեսպան Վարդան Տողանյանը` ելույթ ունենալով Հյուսիսային Կովկասի հարցերով նախարարությունում։
Ինչպես նշեց Ասոյանը, դեսպանն այդ գաղափարը քննարկել է Հյուսիսային Կովկասի հայ գործարարների հետ։ Դրա համար հարմար են դաշնային ճանապարհներից ոչ հեռու ընկած հատվածները։ Նրա կարծիքով, եթե այնտեղ արդեն կառուցված են պահեստներ, ապա ավելի լավ։ Ի դեպ, գործարարները հանդիպման ընթացքում հայտարարել են, որ նման տարածքներ կարելի է գտնել։
«Այստեղ կարելի է նաև տեսակավորել բեռները և դրանք բեռնատարներից տեղափոխել երկաթուղի։ Անհրաժեշտության դեպքում այնտեղ կարելի է ինչ-որ ժամանակով թողնել բեռները», – հավելեց Ասոյանը։
Հայաստանից մեկ-երկու խոշոր արտահանողներ իրենց պահեստներն ունեն Մերձմոսկվայում։ Իսկ այստեղ առաջարկում են նման համալիր բացել արդեն բոլորի համար։
Առաջիկա ամիսներին գործարարներից կպարզեն, թե նրանք ինչպիսի հնարավորություններ կարող են ապահովել նման լոգիստիկ կենտրոնում (կամ կենտրոններում) և որքան ներդրումներ են պատրաստ անել։ Իսկ հետագայում առևտրային ներկայացուցչությունը կարող է բիզնես պլան կազմել։