ԵՐԵՎԱՆ, 25 սեպտեմբերի — Sputnik. «Սուրբ Գրիգոր Լուսավորիչ» հիվանդանոցում պայթած բալոնը հիվանդանոցին չի պատկանում։ Այս մասին Sputnik Արմենիայի թղթակցին դեպքի վայրում հայտնել է հիվանդանոցի տնօրենի ժամանակավոր պաշտոնակատար Արման Հովակիմյանը։
Նա հայտնել է, որ պայթյունից անմիջապես հետո եղել է թթվածնային կայանում ու տեսել, որ պայթած բալոնն այլ տեսակի է և ավելի փոքր է այն բալոններից, որ օգտագործում է հիվանդանոցը։ Իսկ թե ինչպես է «օտար» բալոնը հայտնվել իրենց պատկանող տարածքում, հիվանդանոցի ղեկավարը չցանկացավ վարկածներ հայտնել, թեև չթաքցրեց, որ որոշ տարբերակներ այդ հարցի շուրջ ունի։
Հիշեցնենք, որ այսօր, ժամը12։00-ի սահմաններում, Երևանի «Սուրբ Գրիգոր Լուսավորիչ» հիվանդանոցում թթվածնային բալոն է պայթել։ Պայթյունը տեղի է ունեցել հիվանդանոցին պատկանող թթվածնային կայանի տարածքում, որտեղ բալոնների լիցքավորում է իրականացվում։
Թթվածնային կայանը հիվանդանոցային մասնաշենքից մի փոքր այն կողմ է։ Հիվանդանոցային այլ բաժանմունքներ պայթյունից չեն տուժել։
Թթվածնային բալոնի պայթյունի հետևանքով մահացել է հիվանդանոցի թթվածնային կայանի տեխնիկ–օպերատոր Վահրամ Գասպարյանը, ով հիվանդանոցի տնօրենի պաշտոնակատարի տեղեկություններով 42 տարեկան է, երկար տարիներ աշխատել է հիվանդանոցում, նախկինում համատեղության կարգով նաև մանկական բաժանմունքի վարորդ է եղել։
Պայթյունից տուժած երկրորդ անձը ևս թթվածնային կայանի աշխատակից է։ Նա թեթև վնասվածքներ է ստացել և այս պահին բուժօգնություն է ստանում «Սուրբ Գրիգոր Լուսավորիչ» հիվանդանոցի վերակենդանացման բաժանմունքում։