ԵՐԵՎԱՆ, 24 սեպտեմբերի — Sputnik. Պետք է օրենքով արգելվի եկեղեցու տարածքում բողոքի ցույցերն ու պատարագների խոչընդոտումը: Նման առաջարկով է հանդես եկել ՀՀ ԱԺ փոխնախագահ Էդուարդ Շարմազանովը։
Նա նշում է, որ «վերջին ժամանակներում ի հայտ են եկել գործիչներ, որոնք հրապարակային փորձում են ներմուծել արժեքներ՝ վտանգելով մեր ազգային նկարագիրը, քրիստոնեական արժեքները»:
Վերջին շրջանում տեղի ունեցած քաղաքական փոփոխություններից հետո, նրա խոսքով, ստեղծվել է մի իրավիճակ, որի հետևանքով հարցականի տակ է դրվում Հայոց եկեղեցու բացառիկ առաքելությունը:
Շարմազանովը նաև հիշեցնում է, որ ՀՀ Սահմանադրությամբ Հայաստանի Հանրապետությունը ճանաչում է Հայաստանյաց Առաքելական Սուրբ եկեղեցու`որպես ազգային եկեղեցու բացառիկ առաքելությունը հայ ժողովրդի հոգևոր կյանքում, նրա ազգային մշակույթի զարգացման և ազգային ինքնության պահպանման գործում:
«Վերջին շրջանում մեր եկեղեցու դեմ որոշ խմբերի կողմից սանձազերծած գործողությունները վտանգում են եկեղեցու սոցիալական և ազգային-հոգևոր բացառիկ կարգավիճակը և պարունակում եկեղեցու նկատմամբ բացասական վերաբերմունք ձևավորելու ներուժ: Միևնույն ժամանակ, պետք է ընդգծել, որ ստեղծված իրավիճակին իշխանության հանձնառությունները գերազանցապես կրում են պասիվ բնույթ»,- նշում է Շարմազանովը` հավելելով, որ ստեղծված իրավիճակի հաղթահարման նպատակով գործընկերների հետ որոշել է հանդես գալ «Հավաքների մասին» ՀՀ օրենքում լրացումներ և «Վարչական իրավախախտումների վերաբերյալ» ՀՀ օրենսգրքում փոփոխություններ և լրացումներ կատարելու օրենսդրական նախաձեռնությամբ։
Իրավական փոփոխությունները միտված են արգելելու եկեղեցուն պատկանող պաշտամունքային շինություններում և դրանց հարող տարածքում եկեղեցու և նրա ծիսակարգի կամ դավանաբանության դեմ հավաքներ կազմակերպելն ու անցկացնելը` ներառյալ պատարագները խանգարելը։
Իսկ այդ կարգը խախտելու համար օրենքի նախագծով տուգանք է նախատեսվում։
Շարմազանովը նշում է, որ առաջարկվող փոփոխությունները համահունչ են միջազգային պրակտիկային, նման համաձայնագիր կա Սուրբ Աթոռի և Իտալիայի միջև, խիստ իրավական կառուցակարգեր են գործում նաև Ռուսաստանում ու Եվրամիության անդամ Լեհաստանում:
Նշենք` ավելի վաղ ՀՀԿ խմբակցության պատգամավոր Միհրան Հակոբյանը հայտնել էր, որ առաջիկայում Ազգային ժողովի պաշտոնական փաստաթղթաշրջանառության մեջ է դնելու ՀՀ «Հատուկ պետական պաշտպանության ենթակա անձանց անվտանգության ապահովման մասին» և «Հավաքների ազատության մասին» օրենքներում լրացումներ կատարելու մասին նախագծերը, որոնք նախատեսում են ՀՀ օրենքով ապահովել Ամենայն Հայոց Կաթողիկոսի անվտանգությունը:
Հակոբյանը հիշեցրել էր, որ գործող օրենքով ապահովված է միայն ՀՀ նախագահի, ԱԺ նախագահի և վարչապետի անվտանգությունը: