ԵՐԵՎԱՆ, 24 սեպտեմբերի — Sputnik. «Լույս» դաշինքը մասնակցելու է ԱԺ արտահերթ ընտրություններին։ Այսօր լրագրողների հետ հանդիպման ժամանակ այս մասին ասաց դաշինքի անդամ Անի Սամսոնյանը։
Նա նշեց, որ իրենք կողմ են ԱԺ արտահերթ ընտրությունների շուտափույթ անցկացմանը։
Հիշեցնենք, որ Երևանի ավագանու ընտրություններում հաղթեց «Իմ քայլը» դաշինքը, որին կողմ է քվեարկել ընտրողների 81,06 տոկոսը (294109 ընտրող)։ Երկրորդ տեղում է «Բարգավաճ Հայաստան» կուսակցությունը՝ 6,95 տոկոս արդյունքով (25219)։ Երրորդ հորիզոնականում «Լույս» դաշինքն է՝ 4,99 տոկոս արդյունքով (18112)։
Ընտրությունների մասնակցությունը կազմել է 43,65 տոկոս (370323 ընտրող)։
Այսպիսով՝ «Իմ քայլը» դաշինքի համամասնական ցուցակը գլխավորող Հայկ Մարությանը դարձավ Երևանի նոր քաղաքապետ։
Մարությանը Երևանի քաղաքապետի պաշտոնը կստանձնի հոկտեմբերի 10-ին։
Նշենք, որ ՀՀ վարչապետ Նիկոլ Փաշինյանը երեկ Նյու Յորքի հայ համայնքի հետ հանդիպման ժամանակ նշել է, որ Երևան վերադառնալուն պես բանակցությունների է հրավիրելու խորհրդարանական և ոչ խորհրդարանական ուժերի ներկայացուցիչներին ՝ արտահերթ խորհրդարանական ընտրություններ անցկացնելու ժամանակը և պայմանները նրանց հետ քննարկելու համար։