ԵՐԵՎԱՆ, 22 սեպտեմբերի — Sputnik. «Այն, ինչ կատարվում և առնչվում է լարվածության աճին, դատապարտելի է և անընդունելի»: Խոսելով հայ-ադրբեջանական սահմանին վերջին շրջանում նկատվող սրացումների մասին` Հանրային հեռուստաընկերության «Իրականում» ծրագրի եթերում ասել է ՀՀ ԱԳՆ Զոհրաբ Մնացականյանը։
ՀԱՊԿ-ի՝ որպես տարածաշրջանում անվտանգությունը երաշխավորող և ապահովող կառույցի միջամտության վերաբերյալ հարցին Հայաստանի արտաքին գերատեսչության ղեկավարը պատասխանել է.
«Մենք խոսում ենք մեր կառուցողական ներգրավվածության՝ բացառապես խաղաղության ճանապարհով հարցը լուծելու մեր դիրքորոշման մասին: Բնականաբար, չեմ ցանկանում, որպեսզի դա ընդունվի որպես մեր կողմից վճռականության պակաս. նման բան չի եղել և երբեք չի լինելու: Քանի որ և՛ Հայաստանը, և՛ Արցախը պատրաստ են իրենց պաշտպանելու և այդ գործառույթը մշտապես ինքնուրույն կատարում են: Այդ կարողությունը կա: Միևնույն ժամանակ մենք հանդիսանում ենք ՀԱՊԿ-ի անդամ: Կա կանոնադրական պարտավորություն՝ միմյանց աջակցելու պաշտպանության ոլորտում:
Մենք մեր գործառույթը կատարում ենք այնքանով, որ ՀԱՊԿ անդամ-պետությունները տեղեկացված են և գիտեն տեղի ունեցող բոլոր զարգացումների մասին: Կանոնադրության համապատասխան դրույթների կիրառումը կլինի այն ժամանակ, երբ մենք պնդենք դա, երբ համապատասխան իրավիճակը կգնահատվի այնպես, որ այդ դրույթը պետք է կիրառել»,–ասաց Մնացականյանը:
Հիշեցնենք, սեպտեմբերին շուրջ 1 շաբաթ ադրբեջանական դիրքերից գնդակոծության են ենթարկվում ՀՀ Տավուշի մարզի սահմանամերձ գյուղերն ու ավտոճանապարհները։ Սեպտեմբերի 14-ին գնդակոծվել էին Չինարի գյուղի բնակելի տներն ու մանկապարտեզի շենքը։
Սեպտեմբերի 17-ին Տավուշի մարզի Կոթի գյուղում ադրբեջանական կրակոցներից հրազենային վնասվածք էր ստացել գյուղի բնակիչ Սուրեն Սեփխանյանը։
Մինչ այդ ադրբեջանցիները գնդակոծությունների էին ենթարկել նաև սահմանամերձ Վազաշեն, Բաղանիս և Կոթի գյուղերը։
Նույն օրերին գնդակոծվել էր նաև Նախիջևանի հատվածի հայկական տարածքը։