ԵՐԵՎԱՆ, 20 սեպտեմբերի — Sputnik. Հայաստանի հասարակությունը կարողանում է պատվիրել և արդյունքներ պահանջել, բանավիճել և լուծումներ գտնել: Այսօր` Հայաստանի խորհրդարանի հիմնադրման 100-ամյակին նվիրված միջոցառմանը իր ելույթում նշեց ԱԺ նախագահ Արա Բաբլոյանը:
2018 թ.-ի ապրիլ- մայիսին հայ ժողովուրդը և Հայաստանի իշխանությունները, նրա խոսքով, աշխարհին ևս մեկ անգամ ցույց տվեցին հանդուրժողականության և երկիրը ավելորդ ցնցումների չտանելու բացառիկ օրինակներ: «Խաղաղ ցույցերի արդյունքում հրաժարական տվեց երկրի վարչապետը, խորհրդարանը նոր վարչապետ ընտրեց, և կյանքը վերադարձավ բնական հուն: Սակայն վերջին շաբաթներում Հայաստանի ներքին կյանքը կրկին ալեկոծվում է, և ցավոք, ամեն ցնցման հաջորդում է մյուսը՝ բևեռացնելով հասարակությանը»,-ասաց ԱԺ նախագահը:
Նա վստահ է, որ բաժանարար գծեր չպիտի լինեն:
«Մենք իրավունք չունենք բաժանարար գծեր գծել մեր և մեր միջև: Հայկական պառլամենտարիզմի հարյուրամյա ընթացքի հիմնական դասը միասնությունն է, միշտ առաջ նայելը և կյանքի բոլոր շրջապտույտներում ուժերը ներդնելն է»,-ասաց նա։
Նույն միջոցառման ժամանակ իր ելույթում ՀՀ Նախագահ Արմեն Սարգսյանն էլ նշեց, որ պետականության գաղափարը մշտապես եղել է հայ ժողովրդի հոգու և մտքի մեջ՝ անգամ երբ պետություն չենք ունեցել: «Պետության բացակայության ժամանակ պետականությունը գոյություն է ունեցել՝ ազատության որոնումների, եկեղեցու, հավատքի, պայքարի ու հաճախ ընդվզումների մեջ: Ժամանակը փորձության է ենթարկում և՛ ժողովրդին, և՛ պետությանը, և՛ արժեհամակարգը, որի ճգնաժամը կարող է հանգեցնել նաև պետականության ճգնաժամին»,- ասաց Արմեն Սարգսյանը:
100 տարի առաջ՝ 20-րդ դարի սկզբին, ՀՀ առաջին խորհրդարանին պատմական դեր էր վիճակված, որը ձևավորվեց ոչ թե ընտրությունների, այլ քաղաքական պայմանավորվածությունների միջոցով: «Կարևոր առաքելություն էր վիճակված նաև ՀՀ Գերագույն Խորհրդին, որը հաջորդեց խորհրդային Գերագույն խորհրդին: 21-րդ դարում Հայաստանի երրորդ հանրապետության օրոք մենք վերստին ընտրել ենք խորհրդարանական կառավարման ուղին»,- ասաց Արմեն Սարգսյանը:
ՀՀ վարչապետ Նիկոլ Փաշինյանն էլ նշեց, որ ունենալ խորհրդարան՝ որպես բարձրագույն օրենսդիր մարմին, նշանակում է, որ պետական կառավարման շարժիչ ուժը ժողովրդի կամարտահայտությունն է։
«Որևէ խորհրդարանի գործունեության արդյունավետության և լեգիտիմության աղբյուրը իսկապես ժողովրդի կամքն է, և խորհրդարանը պետք է արտահայտի այն տրամադրություններն ու երազանքները, այն ընտրությունը, որ կատարում են ՀՀ քաղաքացիները»,-ասաց ՀՀ վարչապետը:
Անդրադառնալով ՀՀ–ում տեղի ունեցած փոփոխություններին` Փաշինյանը նշեց, որ հայ ժողովուրդը կարողացավ մարդկության պատմության մեջ աննախադեպ քաղաքական հեղափոխություն իրականացնել: Վարչապետը նաև նշեց, որ այսօր գործող քաղաքական գործիչներն իրենց առաքելությանը պետք է նայեն ոչ թե մեկ օրվա կամ մեկ տասնամյակի, այլ 100- ամյակների կտրվածքով:
Հայաստանի առաջին խորհրդարանի ձևավորման 100-ամյա հոբելյանին նվիրված միջոցառմանը ներկա են ՀՀ և Արցախի նախագահներ Արմեն Սարգսյանը և Բակո Սահակյանը, ՀՀ վարչապետ Նիկոլ Փաշինյանը, Ամենայն Հայոց Գարեգին Բ Կաթողիկոսը, երկու հայկական հանրապետությունների խորհրդարանների նախագահները, ինչպես նաև ՀՀ Գերագույն խորհրդի և ՀՀ Ազգային ժողովի առաջինից վեցերորդ գումարումների պատգամավորները: