ԵՐԵՎԱՆ, 19 սեպտեմբերի — Sputnik. Ոռոգման գրի օգտագործման գործընթացը ստուգելու ընթացքում բազմաթիվ չարաշահումներ են բացահայտվել։ Այս մասին այսօր հրավիրված ասուլիսի ժամանակ ասաց ՀՀ տարածքային կառավարման և զարգացման նախարար Սուրեն Պապիկյանը։
Այս ամառ երկրում ոռոգման ջրի պակաս կար։ Խնդիրը լուծելու համար Հայաստանի կառավարությունն առաջարկեց 40 միլիոն խորանարդ մետրով ավելացնել Սևանից ջրառը` հասցնելով 210 միլիոնի` օրենքով նախատեսված 170 խմ-ի փոխարեն։ Օգոստոսի 29-ին Հայաստանի խորհրդարանը հավանություն տվեց համապատասխան նախագծին։
Ստուգումների ընթացքում պարզվել է, որ մինչ ոռոգման ջուրը հասել է ջրօգտագործողներին, դրա մի մասը «ձախ» խողովակներով գողացել են։ Այսպիսով, իրավախախտները վերցրել են ջուրը և օգտագործել իրենց տարածքներում կամ ավելի մատչելի գներով վաճառել գյուղացիներին, բացատրեց Պապիկյանը։
«Բացի այդ, մենք պարզել ենք, որ իրականում հողատարածքների մակերեսը, որոնք ոռոգման կարիք ունեն, զգալիորեն պակաս է նրանից, ինչ նախկինում հայտարարվել էր», — ասաց նախարարը։
Պապիկյանի կարծիքով` բազմաթիվ պաշտոնյաներ դեռ անփութորեն են վերաբերվում իրենց աշխատանքին և չեն վերահսկում ջրային պաշարներն օգտագործելու գործընթացը։
Նա հայտնեց, որ ջրի օգտագործումը վերահսկելու համար մարզպետարաններում ստեղծվել են հանձնաժողովներ, որոնք ամեն օր զեկույցներ են ուղարկել փոխվարչապետ Տիգրան Ավինյանին։
«Տվյալ պահին Սևանից բաց է թողնվել 26,5 միլիոն խմ ջուր։ Գործընթացը խստորեն վերահսկվում է, և բոլորը պետք է լրջորեն մոտենան այդ հարցին», — ասաց նախարարը։
Ինտենսիվ ոռոգման շրջանում` օգոստոսի 25-ից հոկտեմբերի 1-ը, Արարատյան դաշտում ոռոգման ջրի պահանջարկը կազմում է 80 միլիոն խմ։ Դրանցից 40 միլիոնը գյուղացիները կստանան Սևանից, ևս 19 միլիոնը կապահովվի պոմպակայանների լրացուցիչ աշխատանքի հաշվին, 7 միլիոնը` Ազատի ջրամբարի, 17 միլիոնը` Հրազդան գետից։