Խաչիկ Չախոյան, Sputnik
Նախ, ոչ ոք էլ իր գործում հավերժ չէ: Մասնավորապես, ֆուտբոլում մարզիչների հրաժարականները կամ հեռացումները գործնական պրոցեսի մաս են, որ գրանցվում են վատ արդյունքների կամ վատ հարաբերությունների ու էլի մի շարք այլ պատճառներով: Հայաստանի հավաքականի գլխավոր մարզչի պաշտոնում Վարդան Մինասյանի նշանակումից հետո մարդիկ տարբեր սպասելիքներ ունեին: Նախ, հաշվի առնելով այս մասնագետի ցույց տված հիանալի արդյունքները հավաքականում 2012 թվականին, շատերը կտրուկ փոփոխություններ ու հաղթանակներ էին ակնկալում մեր ընտրանուց, ոմանք էլ վերապահորեն էին մոտենում այս նշանակմանը:
«Մենք մաքսիմալիստ ենք ու միայն հաղթանակ ենք ուզում»: Սա է հայ մարզասերների ու, տվյալ դեպքում, ֆուտբոլի երկրպագուների կարգախոսը: Բայց հաղթանակ ուզելը քիչ է, պետք է իրական պլաններ նախագծել`հաշվի առնել սեփական ու մրցակիցների հնարավորությունները: Իսկ այսօրվա մեր հավաքականն այն թիմը չէ, որ Եվրո 2012-ի ընտրական փուլում հաղթում էր Սլովակիային կամ Մակեդոնիային: Ինչևէ, հիմա Ազգերի լիգայում երկու խաղ անցկացնելուց հետո սկսում ենք կանխատեսել մեր հավաքականի մարզչի ապագա որոշումները:
Այն, որ Հայաստանի հավաքականը Լիխտենշտեյնի ու Մակեդոնիայի հետ հանդիպումներում իր խաղով չտպավորեց, փաստ է (թեկուզ և հաղթեցինք առաջինի հետ խաղում): Սկոպյեում մեր հավաքականը պարզապես չխաղաց ու մտորումների առիթ տվեց: Բայց այս պարտությունից հետո Վարդան Մինասյանի հեռանալը կանխատեսելն արդյո՞ք համապատասխանում է իրականությանը: Համացանցում գրվեց, որ նա նույնիսկ Մակեդոնիայում թիմի մարզմանը չի մասնակցել: Հնարավոր է: Բայց հազար ու մի այլ պատճառ կարող է լինել, այլ ոչ թե միակը` թե նա արդեն պատրաստվում է հեռանալ:
Սեպտեմբերի 22-ին կայանալու է ՀՖՖ նոր ղեկավարության ու գործկոմի նոր անդամների ընտրությունը, չնայած արդեն կարծես թե ամեն ինչ պարզ է: Ռուբեն Հայրապետյանը հեռանում է: Բայց դա դեռևս չի նշանակում, որ հեռանում է նաև Վարդան Մինասյանը: Հավաքականի գլխավոր մարզիչը հաստատ իր գործի բարձրակարգ մասնագետ է և ունի գործող պայմանագիր մինչև 2019 թվականի վերջը: Մեկ պարտությունից հետո հեռանալը հնարավոր կլիներ, եթե դրանից անմիջապես հետո մարզիչը հայտարարեր այդ մասին: Չեմ կարծում, որ Մինասյանը կարող է հրաժարականի դիմում ներկայացնել այս պահին: Հոկտեմբերին մեր ընտրանին Ազգերի լիգայի խաղարկությունում երկու հանդիպում ունի:
Ջիբրալթարի և Մակեդոնիայի հետ հանդիպումներից հետո չեմ բացառում, որ Վարդան Մինասյանի մնալ-չմնալու հարցը նորից քննարկման առարկա դառնա, նույնիսկ եթե մեր հավաքականը երկու խաղերում էլ հաղթանակ տանի: Հիմնական վարկածը լինելու է փոփոխությունները ՀՖՖ-ում, որոնք արդեն հաստատ անխուսափելի են: Ուղղակի չմոռանանք, որ ժամանակին մենք Վարդան Մինասյանին մեր ֆուտբոլի կուռք էինք համարում, և նա դրան արժանի էր իր աշխատանքով ու հավաքականի արդյունքներով: Ավելի լավ է մտածենք, թե ինչպես Մինասյանը կկարողանա բարելավել հավաքականի խաղը ստեղծված իրավիճակում:
Նրա հեռանալը կանխատեսել պետք չէ, Մինասյանը, բնականաբար, հավերժ չի գլխավորելու հավաքականը: Ավելի լավ է մտածենք, թե օրինակ, մարզիչ աշխատելու Յուրի Ջորկաեֆի տարբերակը արդյո՞ք կփոխի մեր հավաքականի խաղը: Որ մարզիչն էլ գա, նրան կատարողներ են հարկավոր: Իսկ մեր հավաքականի ռեսուրսները հաստատ մեծ չեն: