Արմենուհի Մխոյան, Sputnik.
Շիրակի տուրիզմի զարգացման և հետազոտական կենտրոնի նախաձեռնությամբ գյումրեցի փոքրիկ երաժիշտները յուրաքանչյուր շաբաթ և կիրակի ելույթ են ունենում թանգարանների բակում:
Դհոլահար Լիլիա Միրիջանյանը 10 տարեկան է, Գյումրու թիվ 1 երաժշտական դպրոցի սան: Դհոլը սիրել է հայրիկի շնորհիվ. հոր խորհրդով է գնացել դհոլի պարապմունքների և չի զղջացել: Այսօր նրա համար ամենահաճելի գործը դհոլ նվագելն է: Սիրում է, երբ նվագում է, իսկ իրեն լսում են: Սա է պատճառը, որ անմիջապես համաձայնել է առաջարկին՝ ազատ օրերին նվագել Ավետիք Իսահակյանի տուն-թանգարանի բակում: Նրանք, ովքեր սոցիալական ցանցերում տեսել են Լիլիայի նվագը` շտապում են թանգարան, նախ` փոքրիկ աղջկա նվագը լսելու, ապա` վարպետի կյանքին ու գործունեությանը ծանոթանալու:
Թանգարանի այցելուներն արդեն հասցրել են սիրել ոչ միայն Լիլիային, այլև Գյումրու թիվ 3 երաժշտական դպրոցի սանթուրահարների խմբին, որոնց ղեկավարում է Կարինե Հովհաննիսյանը։ Շատերը թանգարան են գալիս հենց նրանց լսելու համար։ Փոքրիկներն արդեն թանգարանի լավագույն այցելուներն են:
Խաչիկ Բաղդասարյանը 12 տարեկան է: Երաժշտական դպրոցում լսել ու սիրել է սանթուրի ձայնը և որոշել է ինքն էլ նվագել։ Այսօր արդեն ընկերների հետ ուրախությամբ նվագում է թանգարանի բակում: Անկեղծանում է՝ կարդալ շատ չի սիրում, բայց հենց թանգարանում շատ բան է սովորել մեծ վարպետի կյանքից:
Առայժմ երեխաները ելույթ են ունենում Ավետիք Իսահակյանի թանգանարում, բայց նմանատիպ ծրագիր` այլ երեխաների մասնակցությամբ, կա նաև Մհեր Մկրտչյանի թանգարանում: Նախագիծը հնարավոր է դարձել իրականացնել Շիրակի տուրիզմի զարգացման և հետազոտական կենտրոնի, անհատ կատարողների, Գյումրու քաղաքապետարանի և Գյումրու թանգարանների տնօրենների ու աշխատակիցների համատեղ աշխատանքի արդյունքում:
Ծրագիրը ոչ միայն խթանում է զբոսաշրջության զարգացումը, այլև ապագա երաժիշտներին է օգնում կայանալ. սա նոր ու հեռանկարային ասպարեզ է նրանց համար: Նախաձեռնությունն առայժմ փորձնական է, սակայն այն շարունակելու և քաղաքի մյուս թանգարաններն ընդգրկելու բոլոր հնարավորությունները կան: