ԵՐԵՎԱՆ, 15 սեպտեմբերի — Sputnik. Հայ վարորդները դադարեցրել են հացադուլը Վրաստանի հետ սահմանին։ Այս մասին Sputnik Արմենիայի հետ զրույցում ասացին մի քանի վարորդ։ Վարորդները գնացել են այդ քայլին, երբ իմացել են ՀՀ տրանսպորտի նախարարության հաղորդագրության մասին։ Վրացի գործընկերների հետ բանակցությունների արդյունքում ևս 15 օր՝ մինչև հոկտեմբերի 1-ը կարելի է Վրաստանի տարածքով բեռնատարով հացահատիկ տեղափոխել։
Ի սկզբանե Վրաստանի կառավարությունը արգելքը մտցրել էր սեպտեմբերի 15-ից, ընդ որում` ոչ միայն հայկական, այլև ցանկացած, այդ թվում՝ սեփական բեռնատարերի համար։ Հացահատիկեղենը թույլ կտան տեղափոխել միայն երկաթուղիով։
«Երևան-Թբիլիսի միկրոավտոբուսներն առավոտվանից սովորական ժամանակացույցով են աշխատել։ Համենայն դեպս, մեր վարորդները ոչ մի արտառոց բան չեն նկատել», — Sputnik Արմենիայի հետ զրույցում ասաց ուղևորատար ընկերություններից մեկի մենեջերը։
Հայ արտադրողներն ասում են, որ արգելքի հետևանքով կարող են աճել այն բոլոր մթերքների գները, որոնք այս կամ այն կերպ կապ ունեն հացահատիկի հետ։ Դրանք են հացը, միսը, հավկիթը և այլն։ Ավելի վաղ Sputnik Արմենիայի թղթակցի հետ զրույցում Հայաստանի թռչնաբույծների միության նախագահ Սերգեյ Ստեփանյանը նշել էր, որ թռչնամթերքի մանրածախ գները կարող են աճել առնվազն 6-8%-ով:
Տրանսպորտի, կապի և տեղեկատվական տեխնոլոգիաների նախարարությունն ու «Հարավկովկասյան երկաթուղին» արդեն հայտարարել են փոխադրման 52%-անոց զեղչերի մասին: Սակայն տեղական արտադրողները նշում են, որ տրանսպորտի ծախսը, միևնույն է, կբարձրանա՝ 22-23 դոլարով մեկ տոննայի համար: Իսկ տրանսպորտի ծախսը հացահատիկի գնի մեջ մոտ 10-15% է:
Երկաթուղու սակագներից բողոքում է նաև Հայաստանի տրասպորտային առաքողների միություն» հասարակական կազմակերպության նախագահ Եղիշե Հովհաննիսյանը: «Ոչ ճկուն սակագների պատճառով սկսել ենք բեռներ կորցնել։ Ընդ որում՝ նույնիսկ այնպիսի խոշոր, ինչպիսին է հացահատիկը», — նշեց նա։
Նշենք, որ վարորդները, որոնք Ռուսաստանից Վերին Լարսով բեռներ, այդ թվում՝ հացահատիկ են բերում Հայաստան չափազանց բարձր գներ են սահմանում։ Վլադիկովկազ-Երևան երթուղու վրա նրանք գրեթե 2,5 – 3 ավելի շատ գումար են պահանջում, քան Մոսկվա-Երևան երթուղու։