ԵՐԵՎԱՆ, 11 սեպտեմբերի — Sputnik. «Իմացեք, Ավստրալիայում լինի, Ամերիկայում լինի, թե որ ծայրում, գտնելու ու վերադարձնելու ենք ամեն լումա, ամեն կոպեկ»:
Այս մասին հայտարարել է վարչապետ Նիկոլ Փաշինյանը՝ խոսելով հայտնի տեսանյութի մասին:
«Սերժ Սարգսյան եւ Ռոբերտ Քոչարյան, որոշել եք մարտահրավեր նետե՞լ, դե հիմա մարտահրավերը տեսեք, ստացեք: Բայց, մենք գործում ենք ըստ օրենքի, մենք ունենք Ազգային անվտանգության ծառայություն եւ ոստիկանություն, ես պահանջում եմ 2 ժամվա ընթացքում կարգ ու կանոն հաստատել էս երկրում», ասել է Փաշինյանը հավելելով՝ եթե իրենք էլ դա անել չգիտեն, մենք գիտենք:
«Ես կամուֆլյաժս կհագնեմ ու փողոց-փողոց, տուն առ տուն այդ կարգ ու կանոնը կհաստատեմ»,-ասել է նա:
«Մեր երկրում սպիտակները հաղթել են եւ սեւերի պարտությունն անշրջելի է, սեւերը ջախջախված են ու այլեւս ոտքի չեն կանգնելու:
Հիմա՝ թե ինչի համար է այս ամեն ինչը. ես, իհարկե, բոլոր մանրամասներին կանդրադառնամ, բայց մի ընդհանուր բան եմ ուզում ասել՝ ենթադրենք, բոլոր ներկաների խոսակցությունները գաղտնալսվել են, դուք ձեր խոսակցությունների մեջ ասում եք բառեր, մտքեր՝ տրամադրությունից ու պայմաններից ելնելով, անգամ հարազատների մասին, ուրեմն պատկերացրեք, մարդիկ են հայտնվել, որ մտածում են՝ ով ինչ խոսի, մեր բոլորի ասածները կարող են լսել ու յութուբում տեղադրել, հեսա ձեզ էնպես յութուբում կտեղադրենք, դուք էլ կզարմանաք»,-հակադարձել է Փաշինյանը:
«Ես ուզում եմ ասել, որ այս 4 ամսում ինձ շատ լավ պահպանում են, բայց պատկերացրեք մի պահ, որ ինձ հետ ինչ-որ բան պատահի, ի՞նչ կլինի հետո… այդ մարդիկ ու բոլորը թող հասկանան, որ եթե ինձ հետ մի բան պատահի, իրենց հետ ավելի վատ բան կպատահի, բայց այս ժողովրդի ձեռքով: Ես սա ասում եմ, որովհետեւ լավ գիտեմ, որ ասվելու է՝ զգույշ եղի, տես չթունավորեն, ավտոյի տակ չքցեն, մի բան չանեն, բայց գիտեմ՝ դուք եք իմ անվտանգությունը»,- դիմելով հավաքված ժողովրդին՝ ասել է նա: