ԵՐԵՎԱՆ, 5 սեպտեմբերի — Sputnik. Հայաստանի կառավարությունը սկսնակ ինժեներական ձեռնարկությունների համար հարկային արտոնությունների նախագիծ է նախապատրաստել։
Ինչպես Sputnik Արմենիային հայտնեց տրանսպորտի, կապի և ՏՏ առաջին փոխնախարար Հակոբ Արշակյանը, նրանց նույն արտոնություններ կառաջարկեն, ինչ սկսնակ IT ընկերություններին։
Իսկ օրինագիծն ուզում են ուժի մեջ մտցնել մինչև 2018 թվականի դեկտեմբեր։
«ՏՏ ոլորտի պետական աջակցության մասին» օրենքով, IT–սթարթափները շահութահարկ չեն վճարում (իսկ եթե սթարթափն ԱՁ–ի անունով է գրանցված, ապա եկամտային հարկ)։ Վճարել պետք է աշխատակիցների աշխատավարձից միայն եկամտահարկը, այն էլ՝ միայն 10%, այն դեպքում, երբ սովորական հարկը 23-36% է կազմում (միջինը` մոտ 25%)։
Օրենքն ուժի մեջ է մտել 2015 թվականին։ Առաջին երկու տարվա ընթացքում արտոնություններ է ստացել մոտ 180 սթարթափ, որոնք ավելի քան 800 աշխատատեղ են ստեղծել։ Այժմ ճիշտ նույնկերպ մեկը մյուսի հետևից հանրապետությունում պետք է շարժիչներ, էլեկտրոնիկա, արևային պանելներ նախագծող և արտադրող ընկերություններ հայտնվեն։ Համենայնդեպս, նման հույսեր ունի կառավարությունը։
«Գուցե ինժեներային ընկերություններ ավելի քիչ լինեն։ Չէ՞ որ բիզնես սկսելը համեմատաբար դժվար է։ Սակայն մենք համոզված ենք, որ այստեղ ևս ոչ քիչ նոր նախագծեր կհայտնվեն», – ասաց Արշակյանը։
Հարկային արտոնություններ ստանալու համար սթարթափները հայտեր են ներկայացնում պետական հանձնաժողովին։ Այնտեղ դրանք ստուգում են օրենքի կետերով (ընկերությունը պետք է մինչև 30 աշխատակից ունենա և չպետք է լինի որևէ գործող ընկերության «դուստր»)։
Սակայն ժամկետների առումով ևս սահմանափակումներ կան։ Արտոնությունների համար հայտերը կարելի էր ներկայացնել մինչև 2017 թվականի դեկտեմբերի 1-ը, արտոնությունները տրամադրվում էին 5 տարի ժամկետով։ Այժմ տրանսպորտի նախարարությունն ուզում է հայտի ներկայացման ժամկետը ևս 3 տարով երկարացնել։ Այսինքն` արտոնություններ ստանալու համար կկարողանան դիմել նաև այն սթարթափները, որոնք ստեղծվել են 2017 թվականի դեկտեմբերի 1-ից հետո։ Արտոնությունները նախկինի պես կտրամադրվեն 5 տարի ժամկետով, մինչև բիզնեսը «ոտքի կանգնի»։