ԵՐԵՎԱՆ, 30 օգոստոսի — Sputnik. Դպրոցների տնօրենների հետ օգոստոսի 29-ին տեղի ունեցած խորհրդակցության ժամանակ ՀՀ կրթության և գիտության նախարար Արայիկ Հարությունյանի և տնօրեններից մեկի երկխոսությունը քննարկման թեմա է դարձել հանրության շրջանում։ Ոմանք նախարարին մեղադրում են մանկավարժին նվաստացնող վերաբերմունքի մեջ։
Այսօր` օգոստոսի 30-ին, կառավարության նիստից հետո Արայիկ Հարությունյանը լրագրողների հետ զրույցում անդրադարձավ այդ միջադեպին` վստահեցնելով, որ ուսուցչին նվաստացնելու խնդիր չկա։
«Դուք միշտ սովոր եք եղել, որ նախարարը տնօրեններին վերևից նայի ու շեֆություն անի»,- ասաց նա` հավելելով, որ իրենց զրույցին նախորդել է շուրջ 2 ժամ տևած բավական ջերմ ու անկաշկանդ մթնոլորտում քննարկումը։
«Այստեղ որևէ նվաստացման երևույթ չկա։ Եվ ինձ ճանաչող որևէ մեկը չի կարող ասել, որ ես որևէ մեկին կարող եմ նվաստացնել»,- ասաց Հարությունյանը։
Նա ավելացրեց, որ այս կառավարությունը շատ է տարբերվում նախորդ կառավարություններից, և այստեղ գործընկերային հարաբերություններ են, ոչ թե շեֆության հարաբերություններ։
Հիշեցնենք` Արայիկ Հարությունյանի ու երևանյան դպրոցների տնօրենների ամենամյա խորհրդակցության ընթացքում թիվ 130 դպրոցի տնօրեն Արմինե Հովհաննիսյանը բողոքել էր, որ օտար լեզուների դասավանդումը սկսվում է երրորդ դասարանից, և երեխաներից շատերը մոռանում են մանկապարտեզներում ստացած հիմնական գիտելիքները։
Նախարարն էլ փորձել էր ստուգել, թե որքանով է իր անցածը հիշում տնօրենը և կասկած հայտնել, որ նա իր խոսքը կկարողանա անգլերեն կրկնել։ Բայց, երբ տնօրենը սկսել էր անգլերեն խոսել, Արայիկ Հարությունյանը չէր հանձնվել ու կնոջը մեղադրել էր ընթացքում նոր տեքստ հորինելու մեջ։ Տնօրենի անգլերեն նոր ելույթից հետո Հարությունյանն անգլերեն շնորհակալություն էր հայտնել, բայց նրա օտար լեզվի իմացության վերաբերյալ կարծիքը չէր փոխել։