ԵՐԵՎԱՆ, 25 օգոստոսի — Sputnik. ՀՀ վարչապետի խորհրդական Արսեն Խառատյանը հրաժարականի դիմում է ներկայացրել Նիկոլ Փաշինյանին։ Այս մասին նա հայտնել է Facebook սոցիալական ցանցի իր էջում։
«Ուզում եմ տեղեկացնել, որ օգոստոսի 23-ին, դիմումիս համաձայն, խնդրել եմ Նիկոլ Փաշինյանին ինձ ազատել Վարչապետի խորհրդականի պաշտոնից: Որոշումս պայմանավորված է եղել երկու` ինձ համար կարևորագույն հանգամանքներով»,- գրել է նա։
Խառատյանը նշել է, որ առաջին հանգամանքն իր ընտանիքն է, որը բնակվում է Թբիլիսիում և տարբեր պատճառներով այնտեղ է լինելու առնվազն մինչև 2019-ի ամառ: Երկրորդ հանգամանքն այն է, որ պետական ծառայությունում շուրջ 3 ամիսների ընթացքի` իր անձնական փոխակերպումները ճշգրիտ գնահատելու ու վերարժևորելու խնդիր ունի:
«Երբ աշխատանքի էի ընդունվում, վարչապետը շատ հստակ խնդիր դրեց. «Էնպես չլինի, որ ամսվա կեսն էստեղ լինես, կեսը` Թիֆլիսում»: Այն ժամանակ ես վստահ ասացի` «իհարկե ոչ»: Այս ամիսների աշխատանքային տեմպը իրոք շատ ինտենսիվ է եղել, և հիմա հասկանում եմ, որ պետք է դադար վերցնել, նախ` ընտանիքիս կողքին լինելու և ապա իմ այս ընթացքը հետահայաց ու ողջ խորությամբ վերլուծել-հասկանալու համար»,- նշել է նա:
Խառատյանը շնորհակալություն է հայտնել իրեն տրված վստահության համար` նշելով, որ հպարտ է իր կարծիքով անկախ Հայաստանի պատմության մեջ այս ամենահաջողված կառավարության և ընկերների հետ այսպիսի ճանապարհ անցնելու հնարավորություն ունենալու համար:
«Ինձ համարում եմ թիմի մաս և անկախ կարգավիճակից ուժերիս ներածին չափով աջակցելու եմ Նիկոլ Փաշինյանի կառավարության գործունեությանը»,- գրել է նա:
Խառատյանի խոսքով` այս ընթացքում ծանոթացել ու աշխատել է իր համար թանկ դարձած շատ մարդկանց հետ, որոնց հետ վստահաբար շարունակելու է ընկերություն անել ապագայում:
«Ուրախ եմ, որ այս օրերին կարողացել եմ նեցուկ լինել որոշ մարդկանց, առնվազն հոգեբանորեն: Հայցում եմ բոլոր նրանց ներողամտությունը, ում այս ընթացքում չեմ հասցրել հանդիպել, խոսել, քննարկել կամ աջակցել: Մեծ հույս ունեմ, որ դրական ներդրում ունեցել եմ պարտականություններս իրականացնելիս, դե իսկ որոշ թերացումներ էլ աշխատանքի անբաժանելի մաս են, ինչ խոսք։Սիրում եմ բոլորիդ, վստահ եմ, որ համատեղ, արդյունավետ ու դուխով աշխատել շարունակելու պարագայում, Հայաստանի պայծառ ու երջանիկ ապագան անկասելի է լինելու…»,- եզրափակել է նա։
Հիշեցնենք, որ Խառատյանը Փաշինյանի խորհրդականն էր նշանակվել հունիսի 5-ին։ Նա հայտնի ազգագրագետ Հրանուշ Խառատյանի որդին է։