Արմենուհի Մխոյան, Sputnik.
Արդեն 5 ամիս է` տիկին Մարիետան իրեն աշխարհի ամենաերջանիկ կինն է համարում: Տարիներ շարունակ բնակարան վարձակալելուց հետո այլևս չի մտածի` ծերության թոշակով մի ամբողջ ամիս սնվի, կոմունալ վճարումներն անի, թե տան վարձը տա: 69 տարեկան Մարիետա Մանդալյանն ապրիլի 20-ից դարձել է Ախուրյանի նորաբաց Ծերերի տան անդամ:
Ամուսինը վաղուց է մահացել, որդի ունի, բայց ճակատագրի բերումով նա բնակվում է ՌԴ-ում։ Տիկին Մարիետան ասում է` «հազիվ է կարողանում իր գլուխը» պահել, բայց չի դժգոհում. որդին աշխատելու նպատակով է գնացել ՌԴ, հետո ընտանիք է կազմել ու մնացել այնտեղ: Հնարավորության դեպքում զանգում է, հարցնում մոր որպիսությունը, բայց հնարավորություն չունի մորը ՌԴ տանելու. ինքն էլ այնտեղ է վարձով ապրում:
Թեև Մարիետան բնակարան չունի, բայց անօթևան չի համարվում. ժամանակին ամուսնու ընտանիքը բնակարան է ստացել, իսկ ըստ գործող օրենքի` ինքը ևս ունենալով նրանց հետ նույն տան գրանցում` անօթևան չի համարվել, չնայած վաղուց արդեն նրանց հետ չի ապրում: Երկար ժամանակ՝ ավելի քան 15 տարի, այս կամ այն տունն է վարձակալել, բայց վարձակալության արժեքի բարձրացման հետևանքով այլևս թոշակը չի բավականացրել: Միակ երազանքը ծերության տարիներին գոնե այդ հոգսից ազատվելն էր:
«Պատահաբար իմացա այս հաստատության մասին: Ծանոթներս առաջարկին ես էլ համաձայնեցի… Ու չեմ կարող նկարագրել, թե որքան գոհ եմ»,- պատմում է տիկին Մարիետան։
Հետո ավելացնում է` այստեղ հոգսից հեռու, անհոգ և ուրախ ենք:
«Չենք մտածում ոչ մի բանի մասին, հարմարությունների մասին երազել նույնիսկ չէի կարող։ 3 անգամ սնվում ենք, չենք մտածում կենցաղային ոչ մի խնդրի մասին, իսկ ազատ ժամանակ շփվում ենք հասակակիցների հետ»,- ուրախությունից փայլող աչքերով ասում է տիկին Մարիետան՝ չմոռանալով իր այս իրականացված երազանքի համար շնորհակալություն հայտնել ոչ միայն բարերարին ու Ծերերի տան ամբողջ աշխատակազմին, այլ նաև նրանց, ովքեր իրեն ասել էին այս հաստատության մասին:
Մարիետան Ծերերի տան առաջին բնակիչներից է: Հպարտությամբ է ցույց տալիս իր սենյակը և ասում, որ այն, ինչ կա սենյակում, ամեն ինչ հաստատությունն է տրամադրել:
Ծերերի տունը կառուցվել է Գերմանիայում բնակվող, Արևմտյան Հայաստանից ներգաղթած Ալբերտ Սևինսի հիմնադրամի միջոցներով: Գործարար, նավթային մագնատ Գալուստ Գյուլբենկյանի բարեգործությունն այս անգամ շարունակել է նրա հորեղբոր թոռը` Ալբերտ Սևինսը։ Ախուրյանում 4000 քառակուսի մետր տարածքում կառուցված երեք մասնաշենքերում բնակվելու հնարավորություն ունեն 63 տարեկանից բարձր տարեցները: Նախապատվությունը տրվում է տնակներում բնակվող միայնակ տարեցներին, անկախ այն հանգամանքից` նրանք ժառանգ ունեն, թե ոչ: Ծերերի տան բնակիչները միայն Գյումրիից չեն, այլ նաև հարևան համայնքներից ու մարզերից:
Տարեցների տունը կոչվում է բարերարի պապի՝ Վորտիկ Գյուլբենկյանի անունով: