ԵՐԵՎԱՆ, 19 օգոստոսի — Sputnik. Hyundai Sonata մակնիշի ավտոմեքենան Աշտարակի կամրջի վրա բախվել է երկաթե արգելապատնեշներին, այնուհետև առաջ ընթացել, բախվել ձախակողմյան հատվածում տեղադրված երկաթե արգելապատնեշներին և մասամբ հայտնվել ճանապարհի մեջտեղում: Այս մասին հայտնում է shamshyan.com-ը։
Դեպքը տեղի է ունեցել այսօր` օգոստոսի 19-ին, ժամը 18:40-ի սահմանում։
Վթարի հետևանքով 1 հոգի տեղում մահացել է, 3-ը մարմնական վնասվածքներով տեղափոխվել են Աշտարակի բժշկական կենտրոն:
Վիրավորներին առաջինը օգնության են հասել քաղաքացիները, ճանապարհային ոստիկաններն ու փրկարարները, որից հետո փրկարարները մահացածի դին պատգարակով մոտեցրել են օպերատիվորեն ժամանած Աշտարակի շտապօգնության ավտոմեքենային:
Ոստիկանությունն ու քննչական բաժինը պարզում են վարորդի, մահացածի և վիրավորների ինքնությունը:
Ըստ կայքի` եթե կամրջի վրա երկաթե արգելապատնեշներ չլինեին, ավտոմեքենան կգահավիժեր ցած:
Վթարված ավտոմեքենայի մոտ էլ հայտնաբերվել է «Եհովայի վկաներ» կրոնական կազմակերպության գրականություն: