ԵՐԵՎԱՆ, 16 օգոստոսի — Sputnik. ՀՀ մշակույթի նախարար Լիլիթ Մակունցը պատրաստվում է Պետրոս Ադամյանի անվան Թբիլիսիի պետական դրամատիկական թատրոնի նոր շենքի կառուցման վերաբերյալ լուրերը քննարկել վրացի գործընկերոջ` Միխեիլ Բատիաշվիլու հետ։
Բանն այն է, որ դեռ Հայաստանի ու Վրաստանի նախկին նախարարների` Արմեն Ամիրյանի ու Միխեիլ Գեորգիձեի օրոք որոշվել էր քանդել Պետրոս Ադամյանի անվան Թբիլիսիի պետական դրամատիկական թատրոնի շենքն ու նորը կառուցել։ Այդ որոշումը մեծ իրարանցում էր առաջացրել ինչպես Վրաստանում, այնպես էլ հայկական հասարակության շրջանում։
ՀՀ վարչապետ Նիկոլ Փաշինյանի գլխավորությամբ մայիսի 30-ին Վրաստան կատարած այցի ընթացքում Մակունցն եղել էր Թբիլիսիի հայկական թատրոնում, ծանոթացել նոր շենքի նախագծին, շփվել թատերախմբի հետ։
«Պաշտոնական այցի ընթացում մենք քննարկել ենք նաև թատրոնի վերականգնման հարցը, ես ինքս թատրոն եմ այցելել, ծանոթացել եմ հայ արտիստների հետ։ Վրաստանի մշակույթի նախարարը (այն ժամանակ դեռ Միխեիլ Գեորգիձեն) վստահեցրել էր, որ թատրոնը երկու տարվա ընթացքում կկառուցվի ու կծառայի իր սկզբնական նպատակին», — ասաց Մակունցը։
Նախարարն ընդգծեց, որ դրանից հետո նա կապ չի հաստատել վրացի գործընկերոջ հետ։ Սակայն այս պահին անհանգստանալու պատճառ չկա։
«Ինձ լուրեր են հասնում, որ նոր շենքն իր անմիջական նպատակից բացի ծառայելու է այլ միջոցառումների անցկացման համար», — ասաց Մակունցը։
Նա նշեց, որ առաջիկայում պատրաստվում է կապ հաստատել Վրաստանի մշակույթի նախարարի հետ ու քննարկել այդ հարցերը։
Հիշեցնենք` ՀՀ մշակույթի նախկին նախարար Արմեն Ամիրյանը նոր թատրոնի կառուցման հարցը բազմիցս քննարկել է վրացի գործընկերոջ հետ։ Նախատեսվում է շինարարությունն ավարտել 2020 թվականին։
Շինարարության ֆինանսավորումն ամբողջովին ստանձնել էր Վրաստանի նախկին վարչապետ Բիձինա Իվանիշվիլին։ Ավելի վաղ նա հովանավորել էր Թբիլիսիի Սուրբ Խաչ հայկական եկեղեցու վերականգնումը։