ԵՐԵՎԱՆ, 10 օգոստոսի — Sputnik. Հայաստանյան վաճառակետերում հայտնաբերված վտանգավոր հավի միսը փաստաթղթային որևէ խնդիր չի ունեցել։
Այս մասին Sputnik Արմենիայի հետ զրույցում ասաց Սննդամթերքի անվտանգության տեսչական մարմնի ղեկավար Գեորգի Ավետիսյանը։
Դրանցում թաքնված վտանգը բացահայտվել է և ապրանքն արդեն հանվել է վաճառքից։
«Այն, ինչ մեր շրջայցի, շուկայի դիտարկման շրջանակներում մեզ հաջողվեց հայտնաբերել, դրանք այլևս շուկայում չեն»,– ասաց մեր զրուցակիցը` հավելելով, որ հայտնաբերված վտանգավոր խմբաքանակն արդեն հանվել է վաճառքից և ոչնչացվել։
Տեսչական մարմնի ղեկավարը, սակայն, չի բացառում, որ շուկայում դեռ պահպանված լինեն նշված խմբաքանակի որոշ մնացորդներ, ուստի տեսչական մարմինն այժմ աշխատում է դրանք հայտնաբերելու ուղղությամբ։
«Մենք հիմա գնում ենք հետագծելիության մեթոդով` ներկրողի մոտ, պահեստները ստուգում, որպեսզի գտնենք, հանենք ու ամբողջը վերացնենք»,– ասաց Ավետիսյանը։
Ի դեպ, հուլիսի 20-ին հայաստանցի սպառողներից մեկը խանութում «կասկածելի էժան» թռչնամիս էր գտել ու դրա մասին ահազանգել սննդի անվտանգության տեսչություն։ Մամուլում հրապարակված լուսանկարի համաձայն, որպես արտադրող ընկերություն պիտակի վրա նշված էր ռուսական «Ресурс» ընկերությունը և, որ միսը նախատեսված է վերամշակման համար։
Սննդի անվտանգության տեսչական մարմնի ղեկավարից հետաքրքրվեցինք` արդյո՞ք նոր բացահայտումները նաև այս արտադրանքն են ընդգրկել։
Գեորգի Ավետիսյանը հայտնեց, որ ահազանգից հետո կատարված ստուգումները ցույց են տվել, որ այդ թռչնամիսը միանգամայն անվտանգ է եղել, բայց նախատեսված է եղել վերամշակվելուց հետո օգտագործման համար։
«Աղալը կամ ոսկրահան անելը նույնպես վերամշակում է համարվում։ Որտեղ որ վաճառվել է, գրվել է` «վերամշակման համար»։ Այսինքն` յուրաքանչյուր մարդ, տեսնելով դա, իր որոշումը պետք է կայացներ` ուզում է գնել, թե ոչ»,– ասաց Ավետիսյանը։
Հիշեցնենք, սննդի անվտանգության տեսչական մարմինն այսօր հայտարարել էր, որ ռուսական, ուկրաինական, բրազիլական արտադրության սառեցված թռչնամսում` հավի թևիկներում ու բդիկներում հայտնաբերվել են սալմոնելայի հարուցիչներ ու վտանգավոր նյութեր (ՄԱՖԱՄ):