ԵՐԵՎԱՆ, 7 օգոստոսի — Sputnik. ՀՀ Քննչական կոմիտեն այս տարվա առաջին կիսամյակի ընթացքում կոռուպցիոն բնույթի հանցագործությունների 551 քրեական գործ է քննել։
Ըստ ՔԿ տարածած պաշտոնական հաղորդագրության` դրանցից 153-ը վերաբերում են զինված ուժերում տեղի ունեցած հանցագործություններին։
Քրեական գործերի մեծ մասը (551 գործերից 403–ը) վերաբերում է տարբեր պաշտոնյաների կողմից իրականացրած հանցագործություններին` յուրացում կամ վատնում, իշխանազանցություն, անգործություն, պաշտոնեական կեղծիք և այլն։
41 գործ վերաբերում է առևտրային կազմակերպություններում կատարված չարաշահումներին, 51-ը՝ կաշառք ստանալուն, 33-ը՝ կաշառք տալուն և այլն։
Քննչական կոմիտեն հայտնում է, որ քննված գործերից 47–ն ուղարկվել է դատարան։ Դրանցով մեղադրվում է 102 անձ, որոնցից 45–ը` զինվորական։