ԵՐԵՎԱՆ, 7 օգոստոսի — Sputnik. Իրան-Հայաստան երկաթուղու կառուցումը լրիվ իրական է։ Sputnik Արմենիայի հետ զրույցում ասաց «Ռուսական երկաթուղիներ» ԲԲԸ–ի տնօրենի առաջին տեղակալ Ալեքսանդր Միշարինը։
«Ռուսական երկաթուղիներ» ԲԲԸ-ի Հարավկովկասյան երկաթուղի ՓԲԸ դուստր ընկերությունը, կոնսեցիոն համաձայնագրի համաձայն, կառավարում է Հայաստանի երկաթուղային ցանցն ու Իրանի հետ նախագծի իրականացման դեպքում շահառուներից մեկը կլինի։
«Մենք իսկապես սկսել ենք զբաղվել այդ հարցով։ Այսօր այդ երթուղին (Պարսից ծոց-Սև ծով, անցնում է Հայաստանով – խմբ.) մուլտիմոդելային է, այսինքն` ներառում է երկաթուղային ու ավտոմոբիլային փոխադրումներ: Մենք կարծում ենք` այդ երթուղու ձևավորման ուղղությամբ Հայաստանի ու Իրանի կառավարությունների թափած ջանքերը պետք է շարունակել ու զարգացնել։ Դա առաջին փուլն է», – նշեց Միշարինը։
Երկրորդ փուլը երկաթուղային երթուղու համար
«Կարծում եմ` Իրան–Հայաստան երկաթուղին գործարկելը տեխնիկապես հնարավոր է։ Պարզապես պետք է աշխատել այդ ուղղությամբ, ներդրումներ գտնել, ու այնպիսի նախագծեր մշակել, որը կարող է հաջորդ 10 տարիների արդյունքներից մեկը դառնալ», – ասաց նա։
Հայաստանում կարծում են, որ երկաթուղու կառուցումը կարող է զգալիորեն չեզոքացնել երկիրը տարածաշրջանային նախագծերից հանելու Թուրքիայի ու Ադրբեջանի փորձերը։ Թուրքիան, Ադրբեջանն ու Վրաստանը հոկտեմբերին Բաքու–Թբիլիսի–Կարս երկաթուղին են մեկնարկում։ Այդ իրադարձությունը Երևանում մեծ անհանգստություն է առաջացրել։
Sputnik Արմենիայի զրուցակիցը կարծում է, որ տրասնպորտային նախագծերը չեն կարող մրցել միմյանց հետ. ամեն ինչ կորոշեն ինքնարժեքն ու փոխադրման պայմանները։ Այդ առումով «Պարսից ծոց – Սև ծով» միջանցքով մուլտիմոդալային փոխադրումները Հայաստանի տարածքով որոշ պայմաններում կարող էին բավականին արդյունավետ աշխատել։
Իրան-Հայաստան երկաթուղու կառուցման ծրագիրը գնահատվում է 3,2 մլրդ դոլար։ ՀՀ կառավարությունը 2014 թ.-ի օգոստոսի 7-ին հավանություն է տվել Իրան-Հայաստան երկաթուղու շինարարության նախնական ծրագրին։ Նախագծի արժեքը գնահատվում է 3,5 մլրդ դոլար։ Երկաթուղու երկարությունը կկազմի 300 կիլոմետր։
Երկաթուղու ենթակառուցվածքում կներառվեն 19,4 կիլոմետր երկարությամբ 64 կամուրջ, 102,3 կիլոմետր երկարության 60 թունել և 27 կայան։
Երկաթուղու նախագիծը մշակել է Չինաստանի շինարարության և հաղորդակցությունների միջազգային ընկերությունը (CCCC International)։ Նախագծով հետաքրքրվում են չինական բանկերը, որոնք պատրաստակամություն են հայտնել ֆինանսավորել ծրագրի 60 տոկոսը։