ԵՐԵՎԱՆ, 5 օգոստոսի –Sputnik. Իսպանիայի ազգային ոստիկանությունը Մալագա գավառում ՀՀ քաղաքացի է ձերբակալել, նրան կազմակերպված հանցավոր խմբերի հետ կապերի մեջ են կասկածում, հայտնում է ՌԻԱ Նովոստին։
Հայաստանի քաղաքացին բնակվելիս է եղել Լիտվայում։ Նրա հետ ձերբակալվել են նաև Վրաստանի երկու քաղաքացիներ։
Ձերբակալություններն իրականացվել են այսպես կոչված «հայկական մաֆիայի» (Եվրոպայում ապրող հայերից բաղկացած խոշոր հանցավոր խմբավորում) դեմ լայնածավալ գործողությունների ժամանակ։ Այդ գործողությունների արդյունքում հունիսի վերջին 129 մարդ էր կալանավորվել։
Տղամարդկանց ձերբակալել են Մարբելիե քաղաքի ռեստորաններից մեկում հանդիպման ժամանակ։ Նախնական տվյալների համաձայն` նրանք ծրագրում էին վերացնել մրցակից խմբավորման անդամներից մեկին, որը մտադիր էր Իսպանիա տեղափոխվել, վերակազմավորել հունիսին քանդված խմբավորումն ու «ցուցադրել կազմակերպության ուժը Եվրոպայում»։
Ձերբակալվածներին մեղադրանքներ են առաջադրվել սպանության փորձի, փաստաթղթերի կեղծման և հանցավոր խմբավորումներին անդամակցելու համար։
Իրավապահ մարմինների գործողությունների արդյունքում հուլիսից 74 խուզարկություն է իրականացվել` Մադրիդում, Բարսելոնայում, Վալենսիայում, Ալիկանտեում, Ալբասետեում, Մուրսիայում, Ժիրոնայում, Գրանադայում։ Ձերբակալվածներին մեղադրանք է առաջադրվել կոռուպցիայի, շորթման, անօրինական զենք պահելու, փողերի լվացման, բնակարանների գողության և այլ հոդվածներով:
Մասնավորապես ստուգումների արդյունքում ոստիկանությունը հայտնաբերել է 100 հազար եվրո, 9 միավոր հրազեն, փամփուշտ, զրահաբաճկոններ, մեծ քանակությամբ ծխախոտ: Իրավապահները նշում են, որ հանցավոր խումբը կազմակերպել է պայմանավորված սպորտային հանդիպումներ, «գնել» է մարզիկների և այլն:
Նշված հատուկ գործողության արդյունքում բացահայտվել է հայ-վրացական քրեական խմբավորում, որը ազգությամբ հայ «օրենքով գողի» հետ ղեկավարում էին Շուշանաշվիլի եղբայրները: Բացի այդ, որոշ տվյալների համաձայն, Իսպանիայում է գտնվում «օրենքով գող» Էրիկ Ջաղինյանը (Շահինյան), որը հայտնի է Էրո Տոմսկի անունով։