ԵՐԵՎԱՆ, 1 օգոստոսի — Sputnik. ՀԱՊԿ գլխավոր քարտուղար Յուրի Խաչատուրովն առանց հավելյալ թույլտվության էլ կարող է մեկնել Մոսկվա`իր պաշտոնեական պարտականությունները կատարելու։ Բայց չի գնում, որպեսզի հետագայում չբախվի բացասական հետևանքների։ Այս մասին Sputnik Արմենիային հայտնեց նրա փաստաբան Միհրան Պողոսյանը։
«Քրեական դատավարության օրենսգիրքը այն անձի համար, ում նկատմամբ խափանման միջոց է կիրառված գրավը, վարույթ իրականացնող մարմնի առաջ որևէ պարտականություն չի նախատեսում։ Սակայն քրդատ օրենսգիրքը նախատեսել է մեկ բացասական հետևանք. նշված է, որ այն մեղադրյալը, ում նկատմամբ խափանման միջոց է կիրառված գրավը, եթե առանց վարույթն իրականացնող մարմնի թույլտվության մեկնել է այլ տեղանք, դատախազն իրավունք ունի դիմել դատարան` գրավը պետական եկամուտ դարձնելու համար»,– ասաց Պողոսյանը։
Նա նաև հավելեց, որ գրավի գումարը չկորցնելու համար իրենք դիմել են վարույթն իրականացնող մարմնին, տվյալ դեպքում` Հատուկ քննչական ծառայությանը, բայց պատասխան առայժմ չեն ստացել։
Միջնորդությունը Միհրան Պողոսյանը ներկայացրել է հուլիսի 30-ին` հայտնելով, որ հուլիսի 31-ին Յուրի Խաչատուրովը ցանկանում է գտնվել իր աշխատավայրում։
«Ենթադրվում էր, որ այդ միջնորդության պատասխանը պետք է ստացվեր մինչև հուլիս 31-ը։ Սակայն 2 օր է անցել, բայց պատասխան չունենք։ Որևէ իրավական խնդիր չկա։ Եթե մենք ցանկանանք, ցանկացած պահի կարող ենք ինքնաթիռի տոմս գնել և լքել Հայաստանը»,–ասաց փաստաբանը` հավելելով, որ ՀՔԾ դիմելով իրենք ուղղակի վերահաստատում են իրենց պատշաճ վարքագիծը։
Նրա խոսքով, միջնորդության մեջ իրենք վարույթն իրականացնող մարմնին տրամադրել են Յուրի Խաչատուրովի մոսկովյան երկու հասցեներն ու հեռախոսահամարները` բնակության և աշխատավայրի։ Միջնորդության մեջ նաև նշվել էր, որ Խաչատուրովը պատրաստ է անհրաժեշտության դեպքում ներկայանալ վարույթն իրականացնող մարմին։
«Մենք չենք հասկանում, թե ինչով է պայմանավորված ՀՔԾ կողմից ՀԱՊԿ աշխատանքների կազմալուծումը»,– ասաց փաստաբանը։
Միհրան Պողոսյանը հայտնեց նաև, որ այս օրերին Յուրի Խաչատուրովի մասնակցությամբ քննչական գործողություններ չեն իրականացվել։ Իսկ ինչ վերաբերում է նրա առողջական, հոգեբանական վիճակին, փաստաբանի խոսքով, վերջինը գտնվում է կայուն վիճակում և տրամադրված է անցնել իր աշխատանքային պարտականությունների կատարմանը։
Հիշեցնենք, Յուրի Խաչատուրովին մեղադրանք էր առաջադրվել Մարտի 1-ի գործով` Սահմանադրական կարգը տապալելու համար՝ ՀՀ Քրեական օրենսգրքի 300.1 հոդվածի հատկանիշներով։ ՀՔԾ-ն միջնորդություն էր ներկայացրել Երևանի ընդհանուր իրավասության դատարան՝ նրան կալանավորելու մասին։ Սակայն դատարանը, հաշվի առնելով ի պաշտոնե նրա համար սահմանված անձեռնմխելիության իրավունքը, որոշեց խափանման միջոց կիրառել 5 մլն դրամ գրավը։
ՀՀ ԱԳՆ խոսնակ Տիգրան Բալայանը նախօրեին լրագրողների հետ հանդիպմանն ասել էր, որ հայկական կողմն առաջարկել է ՀԱՊԿ գործընկերներին` սկսել գլխավոր քարտուղարի փոխարինման գործընթացը։ Իսկ քանի դեռ ՀԱՊԿ–ը որոշում չի ընդունել Խաչատուրովին փոխարինելու վերաբերյալ, նա շարունակում է մնալ այդ կառույցի գլխավոր քարտուղարը։ Ասել էր Բալայանը։