ԵՐԵՎԱՆ, 1 օգոստոսի — Sputnik. Առողջապահության նախարարությունը զգուշացնում է օրգանիկ աղբի կուտակման վտանգների մասին, հատկապես անոմալ շոգին։ Այսօր լրագրողների հետ զրույցում ասաց ՀՀ առողջապահության նախարարության «Հիվանդությունների վերահսկման և կանխարգելման ազգային կենտրոնի» հատուկ վտանգավոր և օդակաթիլային վարակների բաժնի պետ Լիանա Թորոսյանը կոչ արեն Հայաստանի քաղաքացիներին զգոն լինել։
Երևանում արդեն մի քանի շաբաթ է աղբահանությունը պատշաճ կերպով չի իրականացվում։ Երևանի աղբահանության համար պատասխանատու«Սանիթեք» ընկերությունում արդարանում են, որ Վերին Լարսի անցակետում առաջացած խնդիրների պատճառով աղբատար մեքենաների պահեստային մասերը ժամանակին տեղ չեն հասել ու մեքենաներն անսարք են։
Երեկ ընկերության ղեկավարը խոստացել էր 2–3 օրերի ընթացքում լուծել աղբահանության հետ կապված խնդիրները։ Ընկերությունը չի խուսափում պատասխանատվությունից ու խոստովանում է, որ բնակիչներն իրենց պատճառով են տուժել։
«Աղբի կուտակումները միշտ էլ վտանգավոր են ու կարող են համաճարակի աղբյուր դառնալ, մասնավորապես` աղիքային վարակների։ Օրգանիկ աղբի կուտակումների տեղերում տարբեր վարակակիրներ են հավաքում` կրծողներ, միջատներ և այլն», – ասաց Թորոսյանը։
Նա նաև կոչ արեց քաղաքացիներին հետևել բնակարանների հիգիենայի ու մաքրությանը։ Օրինակ` աղբը պետք է աղբամանի մեջ գցել, այլ ոչ թե մուտքի դռան մոտ դնել։
Ընդհանուր առմամբ վարակային հիվանդությունների աճ է գրանցվել, սակայն իրավիճակը կրիտիկական չէ ու համաճարակի բնույթ չի կրում։
«Հայաստանում նախորդ տարվա հունիսին սննդային թունավորման 988 դեպք էր գրանցվել, այս տարի 1107։ Դիզենտերիայով հիվանդների թիվն աճել է 33–ից մինչև 110` այս ու նախորդ հունիսի կտրվածքով», – ասաց Թորոսյանը։
Նա հիշեցրեց, որ ամռանը վարակային հիվանդությունների զարգացման համար բարենպաստ միջավայր է ստեղծվում, այդ պատճառով պետք է զգոն լինել, ավելի լավ լվալ ձեռքերն ու մթերքը։
Թորոսյանը նշեց նաև, որ նախորդ շաբաթ Լոռու մարզի Սարամեջ գյուղում սննդային թունավորման մի քանի դեպք էր գրանցվել։ Սակայն դրանք մեկուսացվել են ու համաճարակը կանխվել է։