ԵՐԵՎԱՆ, 31 հուլիսի — Sputnik. Հորը սպանած Խաչատուրյան քույրերը պարբերաբար բռնության էին ենթարկվում և չէին կարողանում դպրոց հաճախել դեմքին ունեցած վերքերի և կապտուկների պատճառով։ Այս մասին ՌԻԱ Նովոստիին է հայտնել Մոսկվայի Հասարակական Դիտորդական հանձնաժողովի պատասխանատու քարտուղար Իվան Մելնիկովը։
Աղջիկները պատմել են, որ հայրը նրանց կանոնավոր ծեծում էր, և նրանք դեմքի վրա առաջացած կապտուկների և հետքերի պատճառով չէին կարողանում փողոց դուրս գալ, դպրոց հաճախել։ Հայրը մշտապես սպառնում էր նրանց, դրա հետևանքով մի քանի տարի առաջ նրանց մայրը փախել էր տանից։ Նրանց խոսքով` հայրը ստիպել է նրանց ստրուկի դեր տանել` նրանցից մեկին մշտապես իր կողքին պահելով, որպեսզի ծառայի իրեն։
Աղջիկների խոսքով` Միխայիլ Խաչատուրյանը մեծ զինանոց ուներ` որսորդական հրացան, ատրճանակ, դանակ, մահակ։ Նա սպառնացել է դրանք փորձարկել աղջիկների վրա։ Խնամակալության մարմիններն ու ոստիկանության աշխատակիցները դպրոց չէին գալիս, սակայն մի քանի անգամ անհաջող փորձեր են արել նրանց տուն մտնելու։
Իրավապահ մարմինների աշխատակիցներին աղջիկները ասել են, որ տղամարդը թմրանյութերի ազդեցության տակ, առաջինն է հարձակվել նրանց վրա դանակով, և նրանք ստիպված էին պաշտպանվել։ Կրտսեր քույրը, որը 11-րդ դասարանի աշակերտուհի է, հորը դանակի մոտ 35 հարված է հասցրել` վզի և ողջ մարմնի շրջանում։ Մյուս երկու դուստրերը հարվածել են մահացածի գլխին և պղպեղի սրվակից նրա դեմքին փչել։ Դրանից հետո քույրերից մեկը կրտսեր քրոջ ձեռքից խլել է դանակը և հորը սրտի շրջանում հարված հասցրել։ Սպանությունից հետո ամենաերիտասարդ աղջիկը զանգահարել է ոստիկանություն` իրավապահներին պատմելով կատարվածի մասին։
Ավելի վաղ ՔԿ–ից հայտնել էին, որ քրեական գործ է հարուցվել ՌԴ ՔՕ 105-րդ հոդվածի 1 մասով («սպանություն առանց ծանրացնող հանգամանքների»)։ Հոդվածով 6-15 տարի ազատազրկում է նախատեսված։ Դատարանը քույրերից ոչ մեկին չի կալանավորել։