ԵՐԵՎԱՆ, 29 հուլիսի — Sputnik. «Քաղաքացիական պայմանագիր» կուսակցությունը Երևանի քաղաքապետի պաշտոնում առաջադրում է Հայկ Մարությանի թեկնածությունը։
Այս որոշումը կուսակցությունը կայացրել է այսօր կայացած նիստում։
««Քաղաքացիական պայմանագիր» կուսակցության վարչության նիստի ժամանակ քննարկվեց Երևան քաղաքի ընտրություններին մասնակցության ֆորմատը, այսինքն՝ խոսքը գնում էր այն մասին, թե ով կգլխավորի մեր ցուցակը: Ընտրությունը տեղի է ունեցել 2 փուլով. 2-րդ փուլ են անցել Հայկ Մարությանը և Ալեն Սիմոնյանը: 2-րդ փուլով «Քաղաքացիական պայմանագրի» առաջին համար է ընտրվել իմ ընկեր Հայկ Մարությանը»,- ասաց Ալեն Սիմոնյանը:
Նա նաև նշեց, որ «Ելք» դաշինքի ձևաչափով ընտրություններում հանդես գալու հարցը չի քննարկվել:
Հիշեցնենք, որ «Քաղաքացիական պայմանագիր» կուսակցությունը քաղաքապետի 4 թեկնածու ուներ՝ Ալեն Սիմոնյան, Հայկ Մարության, Զարուհի Բաթոյան և Սրբուհի Ղազարյան:
Հիշեցնենք նաև, որ Երևանը 2011թ.–ից Երևանի քաղաքապետի պաշտոնը զբաղեցնող Հանրապետական կուսակցության անդամ Տարոն Մարգարյանը այս տարվա հուլիսի 9–ին հրաժարական տվեց։
Ավագանու արտահերթ ընտրությունն անցկացվում է ավագանու լիազորությունների ժամկետը ավարտելուց հետո ոչ շուտ, քան 30, և ոչ ուշ, քան 40 օրվա ընթացքում: