Քաղաքական ընտրական քարոզարշավը բավականին շատ փող է պահանջում։ Բադալյանը նշում է` արդյունքն ակնհայտ կլինի, եթե այդ փողը ճիշտ ծախսվի։
«Որովհետև դու կարող ես արդյունավետությամբ ծախսել և կարող ես 10 միլիոնն այնպես ծախսել, որ որևէ արդյունքի չհասնես։ Եվ եթե տրամաբանական ու խելացի ձևով օգտագործվի, բնականաբար, արդյունք էլ կլինի»,- ասում է նա։
Բադալյանն օրինակ է բերում թռուցիկների որակն ու բովանդակությունը։
«Դուք ունեք որոշակի գումար, որի մի մասը պետք է թռուցիկ տպագրելու ու բաժանելու վրա ծախսեք։ Այստեղ կարևոր է թռուցիկի բովանդակությունը, դրանք բաժանելու տեղն ու բազմաթիվ այլ կետեր։ Եթե դա դուք գրագետ անեք, պայմանական 1 միլիոն դրամի 10 տոկոսը գրագետ ծախսեք, արդյունք կլինի, բայց եթե անորակ թռուցիկներ պատրաստեք, բովանդակությունն այնպիսին լինի, որ ոչ ոք չհիշի, բնականաբար, ծախսած գումարն անիմաստ կլինի։ Հիմնական ուշադրությունը պետք է լինի գումարի ծախսման որակի վրա»,- ասում է նա։
Եթե նախկինում բարեգործությանը բավականին մեծ տեղ էր հատկացվում, և Գագիկ Ծառուկյանի կուսակցությունն այդ ռեսուրսի արդյունքում բավականին շատ ձայներ էին ստանում, հիմա, ինչպես ասում են, իրավիճակ է փոխվել։
«Նշանակում է` այլ ռեսուրսներ պետք է օգտագործվեն։ Գաղափարական, ծրագրային կոմպոնենտը պետք է գործի դնեն»,- ասում է Բադալյանը։
Նրա խոսքով` եթե կուսակցությունը կարողանա գրագետ ու որակյալ օգտագործել գաղափարական ռեսուրսը, ապա արդյունքը հաջող կլինի։