ԵՐԵՎԱՆ, 21 հուլիսի — Sputnik. ՀՀ վարչապետ Նիկոլ Փաշինյանի ամերիկյան այցը, որ նախատեսված է առաջիկայում, ցույց է տալիս, որ Հայաստանը պատրաստ է բազմակողմանի արտաքին քաղաքականություն վարել։ Այս մասին Sputnik Արմենիա ռադիոկայանի եթերում ասաց քաղաքագետ Երվանդ Բոզոյանը։
Հայտնի է, որ Փաշինյանը սեպտեմբերին կմեկնի ԱՄՆ, որտեղ ելույթ կունենա ՄԱԿ-ի Գլխավոր վեհաժողովում։
«Հայաստանի վարչապետ Նիկոլ Փաշինյանի այցերն անցկացվում են այն հերթականությամբ, որը համապատասխանում է Հայաստանի համար կարևորության աստիճանին։ Ռուսաստանը Հայաստանի ռազմավարական գործընկերն է, ու տրամաբանական է, որ առաջին այցը եղավ հենց Մոսկվա։ Հետո Բրյուսել, քանի որ Հայաստանը մտադիր է համաձայնագրի շրջանակում խորացնել համագործակցությունը ԵՄ-ի հետ», — ասաց Բոզոյանը։
Նրա խոսքով՝ ԱՄՆ կատարելիք այցը ցույց է տալիս, որ Հայաստանը փորձում է բազմակողմանի արտաքին քաղաքականություն վարել, թեև դեռ հայտնի չէ ամերիկյան այցի բնույթը, օրակարգն էլ դեռ որոշված չէ։
Փորձագետը կարծում է, որ առաջին փոխվարչապետ Արարատ Միրզոյանի` ԱՄՆ կատարած այցի նպատակը հենց Փաշինյանի այցը նախապատրաստելն էր։
Բոզոյանն ընդգծեց, որ Հայաստանի համար առաջնային է անվտանգության հարցը, իսկ դա նշանակում է, որ Երևանի ու Մոսկվայի հարաբերությունները չեն փոխվի` անկախ նրանից, թե ով է հիմա իշխանության ղեկին։
«Հայաստանը պետք է ուշադրություն դարձնի հայ-ռուսական հարաբերություններին։ Այլ հարց է, որ տնտեսական զարգացման համար Հայաստանին դիվերսիֆիկացիոն քաղաքականություն է անհրաժեշտ», — ասաց փորձագետը։
Նա նշեց` Հայաստանը հենց դա պետք է հասկացնի ռազմավարական գործընկեր Ռուսաստանին, որպեսզի վերացնի վերջին իրադարձություններից հետո ծնված կասկածները։
«Ադրբեջանը միշտ հույս ունի, որ Հայաստանի ու Ռուսաստանի ռազմավարական հարաբերությունները կարող են փչանալ։ Նրանք հասկանում են, որ քանի դեռ այդ հարաբերությունները կան, իրենք որևէ շանս չունեն», — ասաց Բոզոյանը։
Տնտեսագետ Ատոմ Մարգարյանն իր հերթին մեկնաբանեց երկրի ներքաղաքական իրավիճակն ու ասաց` կարծում է, որ Հայաստանը պետք է բուժվի գլխավոր քաղցկեղից ՝ կոռուպցիայից։
«Դա երկարատև գործընթաց է։ Հայաստանի դեպքում կոռուպցիան տնտեսական աճի խոչընդոտ է դարձել։ Մենք ամեն օր ցնցող բացահայտումների ականատես ենք դառնում», — ասաց Ատոմ Մարգարյանը Sputnik Արմենիա ռադիոկայանի եթերում։
Նրա խոսքով՝ տնտեսության հիմնական ուղղվածությունը կոռուպցիայի դեմ պայքարն է, սակայն նաև անկախ դատական համակարգ է հարկավոր։ Ինչ վերաբերում է այն գումարին, որը ի հայտ է եկել կոռուպցիոն բացահայտումների արդյունքում, ապա այդ 10,5 միլիարդ դրամը կարող է որպես սուբվենցիա ուղղվել մարզեր ՝ գյուղերի խնդիրները լուծելու համար։
«Համայնքները պետք է ծրագրեր ներկայացնեն ու դրանց համար ֆինանսավորում ստանան։ Դա կարող է լուծել եթե ոչ բոլոր, ապա սոցիալական խնդիրների մի մասը», —ասաց Մարգարյանը։
Ինչ վերաբերում է սոցիալական նպաստների, կենսաթոշակների ու աշխատավարձերի բարձրացմանը, ապա միայն կոռուպցիոն բացահայտումների արդյունքում պետական բյուջե եկած գումարով այդ հարցը չի լուծվի։ Փորձագետն ամփոփեց, որ դրա համար լուրջ գումարներ են հարկավոր։