ԵՐԵՎԱՆ, 20 հուլիսի — Sputnik. Պատերազմի վերսկսման վտանգը միշտ կա, և մենք պետք է պատրաստ լինենք այդպիսի զարգացումների։ Այս մասին վարչապետ Նիկոլ Փաշինյանը հայտարարեց այսօր կայացած իր 1–ին մամուլի ասուլիսում։ ՀՀ վարչապետը հավատացած է, որ Ռուսաստանն ունի հնարավորություն և թույլ չի տա, որ պատերազմը վերսկսվի։
«Բոլորս էլ հասկանում ենք, որ ՌԴ–ն որպես գերտերություն, ունի հնարավորություն թույլ չտալու պատերազմի վերսկսումը մեր տարածաշրջանում։ Եվ ես չեմ կարող հավատալ, որ Հայաստանի ռազմավարական գործընկեր և բարեկամ Ռուսաստանն իր լծակները չի օգտագործի տարածաշրջանում ռազմական գործողությունների վերսկումը թույլ չտալու համար»,–ընդգծեց Փաշինյանը։
Ինչ վերաբերում է լարվածությանը, Նիկոլ Փաշինյանն ասաց, որ ռազմաքաղաքական իրավիճակը շարունակում է լարված մնալ։
Զինադադարի ռեժիմի խախտումների վիճակագրության նվազումը վերջին շրջանում, Նիկոլ Փաշինյանի մեկնաբանությամբ, չի նշանակում, որ լարվածությունը նվազել է։