ԵՐԵՎԱՆ, 18 հուլիսի — Sputnik. Մամուլում տարածված լուրերն այն մասին, որ ՀՀ Քննչական կոմիտեի նախագահի տեղակալ Վահագն Հարությունյանը հրաժարականի դիմում է ներկայացրել, հաստատվեցին։
Կառավարության մամուլի ծառայությունից հայտնում են, որ վարչապետ Նիկոլ Փաշինյանի հրամանով Վահագն Հարությունյանն ազատվել է քննչական կոմիտեի նախագահի տեղակալի և հատկապես կարևոր գործերի քննության գլխավոր վարչության պետի պաշտոնից՝ իր դիմումի համաձայն։
Այս հրաժարականը հանրության շրջանում հատկապես մեծ հետաքրքրություն էր առաջացրել, քանի որ Վահագն Հարությունյան 2008թ–ին Հատուկ քննչական ծառայության մարտի 1-ի գործով քննչական խմբի ղեկավարն էր։
Ի պաշտոնե նա բազմիցս հայտարարել էր, որ մարտի 1-ին ոստիկանության գործողությունները եղել են իրավաչափ, երկրորդ նախագահ Ռոբերտ Քոչարյանի հրամանները` օրինական։ Նա նաև հայտարարել էր, որ քննության ընթացքում ծառայողական պարտականությունների չարաշահման որևէ դեպք չի բացահայտվել:
Հիշեցնենք` 2008 թվականի փետրվարի 24-ին Հայաստանի ԿԸՀ-ն հայտարարել էր, որ ընտրություններում հաղթել է Սերժ Սարգսյանը։ Բողոքի ակցիայի մասնակիցները պահանջում էին վերահաշվարկել քվեները։
Մարտի 1-ի գիշերը Ազատության հրապարակում ոստիկանական ուժերը օպերատիվ-հետախուզական գործողություններ էին իրականացրել «տեղանքը ստուգելու» համար, որի արդյունքում հազարավոր ցուցարարների հեռացրել էին հրապարակից։
Մարտի 1-ի երեկոյան ԶՈՒ և ոստիկանության ստորաբաժանումները Երևանի կենտրոնական փողոցներում զենքի, պայթուցիկ սարքերի և հատուկ միջոցների օգնությամբ ցուցարարներին ցրելու համար հատուկ գործողություններ էին իրականացրել։ Արդյունքում հարյուրավոր մարդիկ վնասվածքներ էին ստացել, մահացել էին 8 քաղաքացիական անձ և 2 ոստիկան։
10 տարի չբացահայտված մնացող քրեական գործը թավշյա հեղափոխությունից հետո ՀՔԾ-ում նոր թափ է ստացել։ Հունիսի 3-ին մեղադրանք է առաջադրել ՀՀ պաշտպանության նախկին նախարար Միքայել Հարությունյանին ու նրա նկատմամբ հայտարարել հետախուզում։
ՀՀ 2–րդ նախագահ Ռոբերտ Քոչարյանը հրավիրվել է հարցաքննության`որպես վկա։ Նրա հարցաքննությունը սպասվում է հուլիսի 25-ից հետո` արտերկրում գտնվելու պատճառաբանությամբ։ Այս իրադարձություններից հետո մամուլում մտավախություններ են հնչում, որ մարտի 1-ի գործի հետ կապ ունեցող անձինք կարող են խուսափել արդարադատությունից` հեռանալով երկրից։