ԵՐԵՎԱՆ, 18 հուլիսի — Sputnik. Հայաստանը Հյուսիս-հարավ ճանապարհի շինարարությունը շարունակելու համար ֆինանսների պակաս ունի։ Այս մասին այսօր Արագածոտնի մարզում լրագրողների հետ զրույցում ասաց ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը։
Մասնավորապես, նրա խոսքով, դեռ գումար չկա Արտաշատ-Քաջարան ամենաերկար (304 կիլոմետր) հատվածի համար։ Ընդհանուր առմամբ 222 միլիոն դոլար է ծախսվել, իսկ ճանապարհի ընդհանուր արժեքը մոտ մեկ միլիարդ դոլար է։
«Հիմա արդեն ակնհայտ է, որ մենք կգերազանցենք այդ գումարը», —ավելացրեց նախարարը։
Արտաշատ-Քաջարան հատվածի մասով պատրաստ են միայն ապագա աշխատանքների նախնական գնահատականները, այն էլ` Սիսիան-Քաջարան ամենաբարդ հատվածի համար, որը լեռներով է անցնում։
Դեռ չկա նաև Գյումրիից մինչև վրացական սահման տանող ճանապարհի նախագիծը։
«Շինարարությունից բացի, դժվար է նաև տարածք ազատել։ Մեզ հաճախ են քննադատում, որ մենք Երևանի շրջակայքից ենք սկսել։ Բանն այն է, որ այստեղ ապագա ճանապարհի գոտում մասնավոր տները համեմատաբար ավելի քիչ են», — նշեց նախարարը` ավելացնելով, որ այդ պատճառով այստեղ հողերը գնելու ու մարդկանց բնակեցնելու համար ավելի քիչ ժամանակ ու գումար է ծախսվել։
Թե երբ ճանապարհը պատրաստ կլինի, հայտնի չէ։ Պատճառը նույնն է ` գումար չկա։
«Հյուսիս-հարավ» տրանսպորտային միջանցքը ռազմավարական նշանակություն ունի Հայաստանի համար։ 550 կմ երկարություն ունեցող այդ ճանապարհը թույլ կտա դուրս գալ դեպի Սև ծով և եվրոպական երկրներ՝ կապ ապահովելով Իրանի և Վրաստանի հետ:
Հայաստանը դեռևս 2009 թվականին վարկային համաձայնագիր է ստորագրել Ասիական զարգացման բանկի հետ։ Համաձայնագրով նախատեսվում էր մայրուղու շինարարությունն ավարտել 2016 թվականին, սակայն շինարարական աշխատանքները սկսեցին բանկի հետ պայմանագիրը կնքելուց միան երեք տարի անց։