ԵՐԵՎԱՆ, 18 հուլիսի — Sputnik. Փանիկում հուլիսի 17-ի տեղի ունեցածի թեմայով ռուսական 102-րդ ռազմաբազայի հրամանատարությունը ծառայողական քննություն կսկսի: Այս մասին Sputnik Արմենիային ասաց Շիրակի մարզպետ Կարեն Սարուխանյանը:
Հուլիսի 18-ին մարզպետն ընդունել է ռազմաբազայի անձնակազմի գծով հրամանատարի տեղակալ Ալեքսեյ Պալյուխովիչին: «Հանդիպման ընթացքում ասացին, որ եղել է ֆորս մաժորային իրավիճակ: Հրամանատարության կողմից հրաման չի եղել: Վստահեցրին, որ հաջորդ անգամ չի կրկնվի և ներողություն խնդրին բնակիչներից կատարվածի համար՝ նշելով, որ սա նմանատիպ առաջին դեպքն է և որ մեղավորները պատասխան են տալու»,-ասեց Շիրակի մարզպետը և հիշեցրեց, որ հայ-ռուսական միջպետական պայմանագրով էլ է նախատեսված նման միջոցառումների, վարժանքների դեպքում նախապես տեղեկացնել մարզպետին և համայնքի բնակիչներին:
Հանդիպման ավարտից հետո հրամանատարի տեղակալ Ալեքսեյ Պալյուխովիչը, պատասխանելով Sputnik Արմենիայի հարցին նշեց, որ ինքը մարզպետին փոխանցել է 102-րդ ռազմաբազայի հրամանատարի մտահոգությունը:
«Այս պահին չեմ կարող պատասխանել, քանի որ ծառայողական քննություն ենք անցկացնում, իսկ քննության արդյունքների մասին անպայման կտեղեկացնեք»,-նշեց հրամանատարի տեղակալը:
Հիշեցնենք, որ երեկ` հուլիսի 17-ի առավոտյան, Գյումրիում տեղակայված 102-րդ ռազմաբազայի զինծառայողները զորավարժություն են անցկացրել Արթիկի տարածաշրջանի Փանիկ գյուղի վարչական տարածքում։ Զորավարժություններն ուղեկցվել են կրակոցներով: Այս մասին Sputnik Արմենիային տեղեկացրել էր Փանիկ համայնքի ղեկավար Վարդան Մակեյանը՝ փաստելով, որ երեխաները վախեցել են:
«Գյուղի տարածքը ռազմաբազայի զորավարժությունների անցկացման համար երբևէ չի ծառայել, և ռազմաբազայի ղեկավարությունից այս մասին պաշտոնական գրություն չենք ստացել»,-նշեց համայնքի ղեկավարը` ասելով, որ ինքն անմիջապես այդ մասին տեղեկացրել է Շիրակի մարզային ոստիկանությանն ու Ազգային անվտանգության ծառայությանը:
Ուժային կառույցների աշխատակիցները մեկնել էին գյուղի տարածք` իրավիճակին ծանոթանալու: