ԵՐԵՎԱՆ, 16 հուլիսի — Sputnik. ՆԱՏՕ-ի` հակամարտությունների լուծման մասին հռչակագիրը համապատասխանում է Հայաստանի` Արցախի վերաբերյալ հայտարարություններին։ Այս մասին այսօր ճեպազրույցի ժամանակ ասաց ՀՀ արտգործնախարարության մամուլի խոսնակ Տիգրան Բալայանը։
Բրյուսելում ընդունված հռչակագրում նշվում է, որ դաշինքը Հայաստանի, Ադրբեջանի, Մոլդովայի ու Վրաստանի տարածքային ամբողջականության, անկախության ու ինքնիշխանության կողմնակից է։
«ՆԱՏՕ-ի հռչակագրի 67-րդ պարագրաֆում նշվում է, որ հակամարտությունները պետք է լուծվեն գործող ձևաչափերում ու միջազգային սկզբունքների` ՄԱԿ-ի կանոնադրության ու Հելսինկիի եզրափակիչ ակտի վրա հիմնվելով», — ասաց Բալայանը։
Նրա խոսքով` դա հենց այն է, ինչի մասին խոսում է Հայաստանը` միջազգային իրավունքի ու գործող ձևաչափի շրջանակում լուծման մասին։
ՆԱՏՕ-ի ամփոփիչ հռչակագրում, որն ընդունվել է Բրյուսելում, նշվում է, որ դաշինքը հավատարիմ է Հայաստանի, Ադրբեջանի, Վրաստանի և Մոլդովայի տարածքային ամբողջականությանը, անկախությանը և ինքնավարությանն աջակցելուն։
Նշվում է, որ ՆԱՏՕ-ն շարունակում է ջանքեր գործադրել Հարավային Կովկասում, ինչպես նաև Մոլդովայի Հանրապետությունում հակամարտությունների խաղաղ կարգավորման ուղղությամբ այդ սկզբունքների և միջազգային իրավունքի նորմերի, ՄԱԿ-ի կանոնադրության և Հելսինկյան եզրափակիչ ակտի հիման վրա։