Պարզվեց` ՀՀԿ–ականներից ում համար է Մալիշկայի գյուղապետն ընտրակաշառք բաժանել գյուղացիներին

ԵՐԵՎԱՆ, 16 հուլիսի — Sputnik. Հուլիսի 14-ին հատուկ քննչական ծառայությունը հաղորդագրություն էր տարածել, որտեղ ասվում էր, որ Վայոց Ձորի մարզի Մալիշկա համայնքի ղեկավարը մեղադրվում է ՀՀԿ-ական ռեյտինգային թեկնածուի համար ընտրակաշառք բաժանելու համար։ Հաղորդագրության մեջ, սակայն, նշված չէր, թե ով է եղել այդ թեկնածուն։

Ոստիկանությունն այսօր` հուլիսի 16-ին, նոր բացահայտումներ է հրապարակել, որտեղ ի թիվս այլ փաստերի, հայտնել է նաև ընտրակաշառք բաժանած թեկնածուի անունը։

«Մալիշկա համայնքի ղեկավար Մհեր Մովսիսյանը, որը Հայաստանի Հանրապետական կուսակցության անդամ է, պատգամավորի թեկնածու Աշոտ Արսենյանից առձեռն ստացել է 13.000.000 դրամ՝ ընտրակաշառք բաժանելու և Արսենյանի օգտին 1300 ձայն ապահովելու նպատակով»,- ասված է ոստիկանության հաղորդագրության մեջ

Հիշեցնենք` ՀՔԾ-ն հայտնել էր, որ այս գումարի դիմաց գյուղապետը խոստացած 1300 ձայնի փոխարեն ընդամենը 800 ձայն էր ապահովել, ուստի մնացած 5 մլն դրամը վերադարձրել էր թեկնածուին։

Բայց սա դեռ ամբողջը չէ։ Ոստիկանության հաղորդագրության համաձայն` Մալիշկա գյուղապետից բացի, չարաշահումներին մասնակցել է նաև որդին, որը Մալիշկայի մարզադպրոցի տնօրենն է ու գյուղապետարանի հաշվապահը։

Հայր ու որդի 2016 թվականի հունվարի 1-ից մարզադպրոցում որպես բուժքույր են ձևակերպել գյուղապետի կնոջը, որն աշխատանքի չի հաճախել, բայց մինչև 2018թ-ի մայիսը 2.160.000 դրամ աշխատավարձ է ստացել։

Բացի այդ, 2017 թվականին գյուղապետը գյուղապետարանի հաշվապահին հրահանգել է գյուղի սոցիալապես անապահով 11 բնակչի անվամբ 410.000 դրամ օգնություն դուրս գրել ու գրպանել է ամբողջ գումարը։

Ի դեպ, նշենք, որ թեև նախաքննական մարմինը միջնորդել էր կալանավորել գյուղապետին, բայց դատարանը նրան ստորագրությամբ ազատ է արձակել։

Բացահայտում. Ուրցաձորի գյուղապետը յուրացրել է մանկապարտեզին հատկացված 26 միլիոն դրամը

4 հուլիսի 2018, 14:29

Հիշեցնենք, որ 2017թ-ի խորհրդարանական ընտրություններում Վայոց ձորի և Սյունիքի մարզերն ընդգրկող ընտրատարածքից պատգամավոր էին ընտրվել ՀՀԿ-ականներ Վահե Հակոբյանն ու «Ջերմուկ գրուպ» ընկերության սեփականատեր Աշոտ Արսենյանը։

Հատուկ քննչական ծառայությունը դատարանին միջնորդել է գյուղապետ Մհեր Մովսիսյանի նկատմամբ խափանման միջոց կիրառել կալանավորումը։

Մալիշկայի գյուղապետ Մովսիսյանը 1989-2002թթ. աշխատել է գյուղի դպրոցում որպես ֆիզկուլտուրայի ուսուցիչ:

Իսկ 2002թ.-ին ընտրվել է գյուղապետ ու անփոփոխ մնացել այդ պաշտոնում մինչ օրս։

2006թ. Մովսիսյանը ՀՀ նախագահի հրամանագրով պարգևատրվել է «Անանիա Շիրակացի» մեդալով:

2007թ. պարգևատրվել է ՀՀ տարածքային կառավարման նախարարության ոսկե մեդալով:

2011թ. ՀՀ վարչապետի հրամանագրով ճանաչվել է համայնքի լավագույն ղեկավար:

Ոստիկանությունը հայտնեց Մալիշկայի գյուղապետի միջոցով ընտրակաշառք բաժանած ՀՀԿ–ականի անունը