ԵՐԵՎԱՆ, 13 հուլիսի — Sputnik. «1000 դրամների հիմնադրամ» պայմանական անունը ստացած «Զինծառայողների ապահովագրության հիմնադրամն» անխափան գործում է։ Այս մասին այսօր լրագրողների հետ հանդիպման ժամանակ ասաց պաշտպանության նախարարի խորհրդական Գեղամ Հարությունյանը` ի պատասխան Sputnik Արմենիայի հարցի, թե արդյո՞ք հիմնադրամներում բացահայտված խնդիրների համատեքստում անհրաժեշտություն չի առաջացել վերանայելու նաև պաշտպանության ոլորտում գործող հիմնադրամների աշխատանքը։
««1000 դրամների հիմնադրամը գործել է և գործելու է։ Հիմնադրամն անհրաժեշտ է, որովհետև այս ոլորտում մենք խնդիր ունենք, որի լուծմանը մեծապես աջակցում է հենց հիմնադրամը»,- ասաց նա։
Միակ խնդիրը, Հարությունյանի համոզմամբ, հիմնադրամի վճարումների համահավասարության սկզբունքն է։
«Ես այս որոշումը ճիշտ եմ համարել նաև այն ժամանակ, երբ կայացվեց։ Միակ իմ վերապահումն այն է եղել, որ հավասար մոտեցման փոխարեն կարող էր կիրառվել 1%-ի մոտեցում` ըստ եկամտի։ Այսինքն` եթե ես ստանում եմ 300 000 դրամ, ես կվճարեի 3000 դրամ, իսկ նա, ով ստանում է 800 000 դրամ, կա կվճարեր 8000 դրամ»,- ասաց Հարությունյանը։
Ինչ վերաբերում է «Մարտիկ» հիմնադրամին ու դրա վերաբերյալ հարուցված քրեական գործին, Հարությունյանը նշեց, որ այդ հիմնադրամի գործունեությունից անտեղյակ է և ինքը չէ այն իրավասու պաշտոնյան, ով կարող է որոշակի տեղեկություններ հայտնել։
««Մարտիկ» հիմնադրամի գործունեությանը տեղյակ չեմ` ինչ միջոցներ են հավաքել, ինչ ծրագրեր են հաստատել և ինչպես են ծախսվել»,- ասաց նա։
Այդուհանդերձ, նախարարի խորհրդականը հայտնեց, որ «Մարտիկ» հիմնադրամի ծրագրերը` այցելություններ զինծառայողներին, Նոր տարվա նվերներ, սոցիալական աջակցություն ազատամարտիկներին, բուժման ֆինանսական աջակցություն և այլն, իրականացվել են հենց ՊՆ-ի կողմից։
Հիշեցնենք` հուլիսի 10-ին ՀՀ քննչական կոմիտեն հայտարարեց, որ քրեական գործ է հարուցվել «Մարտիկ» հիմնադրամում արձանագրված չարաշահումների դեպքով։
Գործի հարուցման համար հիմք է հանդիսացել Երևանի ավագանու «Ելք» խմբակցության անդամ Անահիտ Բախշյանի դիմումը, ըստ որի` 2008-2017 թթ.- ին «Մարտիկ» հիմնադրամի գործադիր տնօրենի կատարած վարչական ծախսերը 10 տոկոսով կամ 26 191 377 ՀՀ դրամով գերազանցել են ընդհանուր ծախսերը։