ԵՐԵՎԱՆ, 11 հուլիսի — Sputnik. Ադրբեջանի պաշտպանական արդյունաբերության նախարարությունն արձանագրություն է ստորագրել «Aeronautics» իսրայելական ընկերության հետ նոր տեսակի անօդաչու թռչող սարքերի արտադրություն սկսելու մտադրությունների մասին։
Այդ մասին հաղորդում են ադրբեջանական լրատվամիջոցները` հղում անելով երկրի պաշտպանական արդյունաբերության նախարարությանը։
Փաստաթուղթը ստորագրվել է պաշտպանական արդյունաբերության նախարարության ղեկավարի տեղակալ Յախյա Մուսաևի և «Aeronautics» ընկերության տնօրենների խորհրդի ղեկավար Յեդիդա Յաարինի հանդիպման ընթացքում։
Կողմերը նշել են «AZAD Systems»–ի հաջող աշխատանքի մասին, որն արտադրում է տարբեր տեսակի անօդաչու թռչող սարքեր։