ԱԱԾ–ՀՔԾ համագործակցության արդյունքում նոր մանրամասներ են ի հայտ գալիս Մանվել Գրիգորյանի գործով։
Շարունակելով ստացված տեղեկությունների ճշգրտման գործընթացը` իրավական օգնություն ցույց տալու միջնորդություն էր ուղարկվել Արցախի Հանրապետության իրավապահ մարմիններին, որի շրջանակներում 2018 թվականի հունիսի 20-ի առավոտյան խուզարկություն է կատարվել Արցախի Հանրապետության պաշտպանության բանակի N զորամասի հարակից` «Արա Լեռ» կոչվող տարածքում գտնվող Մանվել Գրիգորյանին պատկանող առանձնատանը:
Կրկին հայտնաբերվել են «Զինվորի բաժին» մակագրությամբ մսի պահածոներ, ծխախոտ, զինվորական ներքնահագուստ և արտահագուստ, հիգիենայի պարագաներ, վիրակապեր, բենզին, ինքնաձիգի մեծ քանակությամբ 7,62 և 5,45 մմ տրամաչափերի փամփուշտներ:
ՀՀ ԱԺ պատգամավորի տարածքից հայտնաբերվել է նաև հասցեատիրոջը չհասած ծաղկեպսակ:
Հունիսի 20-ին Արցախի ԱԱԾ–ն օպերատիվ հետախուզություն է իրականացրել Ասկերան քաղաքի տարածքի Միրզաջան կոչվող տեղանքում տեղակայված «ՋԻ-Էս Պլյուս» ՍՊԸ պահեսում: Արդյունքում պարզվել է, որ ԵԿՄ հասարակական կազմակերպության ղեկավար կազմը հափշտակել է ՀՀ պաշտպանության նախարարությունից, Արցախի պաշտպանության բանակից, ինչպես նաև տարբեր կազմակերպություններից և քաղաքացիներից ապրիլյան քառօրյա պատերազմի օրերին որպես օգնություն տրամադրված առանձնապես խոշոր չափերով պարենային ապրանքներ:
Մասնավորապես հայտնաբերվել է «Զինվորի բաժին» գրառմամբ թվով 25 հատ մսի պահածո, 229 հատ տարբեր տեսակի դատարկ պահածոների տարաներ, 2537 հատ գուլպա, 19,425 տուփ ծխախոտ, 882 զույգ ձեռնոց և այլ ապրանքներ:
Քրեական գործի բոլոր հանգամանքների լրիվ և օբյեկտիվ հետազոտման ուղղությամբ տարվող քննչական գործողություններն ու օպերատիվ-հետախուզական համագործակցված միջոցառումները շարունակվում են:
Հիշեցնենք, որ Հայաստանի Հանրապետության ազգային անվտանգության ծառայության աշխատակիցները, դեռևս 2018թ. հունիսի 16-ին Էջմիածին քաղաքում խուզարկություններ էին անցկացրել ԱԺ պատգամավոր Մանվել Գրիգորյանի տանը, ամառանոցում և նրան պատկանող այլ տարածքներում:
Նախաքննությունը շարունակվում է: