ԵՐԵՎԱՆ, 18 հունիսի — Sputnik. Կուտակային կենսաթոշակի եկամտաբերությունը գնաճից ցածր չի լինի։ Այդ մասին երկուշաբթի խորհրդարանում հայտարարեց Հայաստանի ֆինանսների նախարար Ատոմ Ջանջուղազյանը` ներկայացնելով «Կուտակային կենսաթոշակների մասին» օրենքում փոփոխությունների նախագիծը։
Հուլիսի 1–ից կուտակային կենսաթոշակները պետք է պարտադիր դառնան։ 1974թ-ին և դրանից հետո ծնված բոլոր աշխատողները վճարելու են աշխատավարձի 5 տոկոսը։ Այդ միջոցները կկառավարեն մասնավոր կենսաթոշակային հիմնադրամները (երկուսից մեկը` քաղաքացու ընտրությամբ)։
Հիմնադրամները չեն տնօրինի քաղաքացիների փողերը, միայն կկառավարեն դրանք։ Ներդնելով արժեթղթերում` դրանք պետք է ապահովեն ընթացիկ գնաճից ոչ պակաս եկամտաբերություն։
Ինչպես հայտարարվել է նախկինում, կնվազեն նաև պահումները։ Քաղաքացու հաշվին նախկինի նման կփոխանցվի նրա աշխատավարձի 10 տոկոսը։ Եթե նախկինում դրանից 5 տոկոս վճարում էր քաղաքացին, 5 տոկոս` պետությունը, ապա հիմա հարաբերակցությունը փոխվում է 2,5/7,5 տոկոս (2,5 տոկոս քաղաքացուց, 7.5 տոկոս բյուջեից)։
Ներդրված փողերն անհասանելի կլինեն մինչև թոշակի անցնելը։ Բացառություն կկազմեն միայն կյանքի համար սպառնալիք ներկայացող ծանր հիվանդությունները։ Նման դեպքերը կորոշի առողջապահության նախարարությունը։
Հայաստանում պարտադիր կուտակային կենսաթոշակային վճարումներն արդեն կատարում է 200 հազար մարդ, իսկ հուլիսի 1–ից նրանց կմիանա ևս 80 հազարը։
Օրինագիծը կքննարկվի խորհրդարանի վաղվա արտահերթ նիստում` մինչև հուլիսի մեկն այն ընդունելու և գործարկելու համար։