ԵՐԵՎԱՆ, 11 հունիսի — Sputnik. Կուտակային կենսաթոշակային համակարգի պարտադիր բաղադրիչի կիրառությունը չի հետաձգվի։ ՀՀ կառավարությունը որոշել է հուլիսի 1-ից ուժի մեջ մտնող օրենքը չհետաձգել` հակառակ նախկինում արված հայտարարության։
Համապատասխան նախագիծն այսօր ընդունվեց ՀՀ կառավարության արտահերթ նիստում։
ՀՀ վարչապետ Նիկոլ Փաշինյանը հայտնեց, որ այս տարի հուլիսի 1-ից գործարկվող համակարգը չի հետաձգվի, այլ միայն որոշակի փոփոխությունների կենթարկվի։
«Արդեն անհնար է հրաժարվել համակարգից։ Այս պահի դրությամբ կուտակային ֆոնդերում արդեն հավաքված է 120 միլիարդ դրամ, դրա 70%-ը տնօրինում են համաշխարհային բարձր վարկանիշ ունեցող կառավարիչներ, որոնց հնարավոր չէր բացատրել, որ երկիրը փոխվել է ու հիմա պիտի փոխվեն նաև այս օրենքները։ Բացի այդ, դա նաև շատ բացասաբար կազդեր Հայաստանի վարկանիշի վրա»,- ասաց Փաշինյանը։
Ինչ վերաբերում է նախկինում խոստացված հետաձգմանը, Փաշինյանի խոսքով, դա անարդար կլիներ համակարգում 2014թ-ից ի վեր ընդգրկված ՀՀ քաղաքացիների նկատմամբ։
«Նրանք կարող են ասել`մենք 2014թ-ից վճարում ենք ու հանկարծ մեր համաքաղաքացիների նկատմամբ այլ մոտեցում է կիրառվում։ Խնդիր էր առաջանալու, այդ 200 000 քաղաքացիների նկատմամբ անարդարություն էր առաջանալու»,- ասաց վարչապետը` հավելելով, որ ստեղծված իրավիճակում կառավարությունը որոշել է որոշ փոփոխություններ անել գործող օրենքում, մասնավորապես` փոխել համամասնությունը։
Այսպես` եթե այսօր կենսաթոշակային համակարգի մասնակիցն իր աշխատավարձից կուտակվող 10%-ից վճարում է 5-ը, մնացած 5-ը վճարում է պետությունը, ապա օրենքի փոփոխությունից հետո կվճարի 2,5%-ը, մնացած 7.5-ը` նրա փոխարեն կվճարի պետությունը։
«Այսինքն` 2018թ-ի հուլիսի 1-ից համակարգում ներառված 200 000 քաղաքացիները կզգան թեթևացում, յուրաքանչյուրը շուրջ 5000 դրամով ավելի քիչ կվճարի, այսինքն` մենք 200 000 քաղաքացիների աշխատավարձը 5000-ով ավելացնում ենք»,- ասաց Փաշինյանը։
Իսկ հուլիսի 1-ից համակարգին միացողների բեռը համեմատաբար ավելի քիչ կլինի իրենց նախորդների բեռից։
Կառավարության հաշվարկով` հուլիսի 1-ից համակարգին միացողների թիվը 60 000 — 80 000 է։
Հիշեցնենք` հուլիսի 1-ից ուժի մեջ մտնող կուտակային կենսաթոշակային համակարգի պարտադիր բաղադրիչը գործելու է 1974 թվականի հունվարի 1-ից հետո ծնված բոլոր աշխատողների համար։ Այդ համակարգին արդեն միացել էին պետական կառավարման համակարգի աշխատակիցները և նրանք, ովքեր մեկ տարի առաջ ինչ-ինչ պատճառով համակարգից հրաժարվելու դիմում չէին գրել։