Կաթողիկոսի հրաժարականը պահանջող ցուցարարներն անցան Երևանի կենտրոնով. տեսանյութ

Ցուցարարները, որոնց առաջնորդում են հոգևորականները, շարունակում են պահանջել Ամենայն հայոց կաթողիկոս Գարեգին Բ-ի հրաժարականը։ Տեսանյութում դիտեք նրանց բողոքի երթը։
Sputnik

Գարեգին Բ–ի հրաժարականը պահանջող ցուցարարներն այսօր` հունիսի 11-ին, կրկին բողոքի քայլերթ էին կազմակերպել։ Երթի մասնակիցները «Գարեգին, հեռացիր», «Նոր Հայաստան, նոր հայրապետ», «Ազատ, անկախ Մայր Աթոռ» վանկարկումներով անցան Երևանի կենտրոնով՝ կոչ անելով միանալ իրենց երթին։

Արդեն մի քանի օր է` կաթողիկոսի հրաժարականի պահանջով շարժում է ձևավորվել։ Շարժման մասնակիցները` Հայր Կորյուն վարդապետի, Տեր Արմեն քահանայի և Տեր Կորյուն քահանայի գլխավորությամբ, հավաքվում են Երևանում կաթողիկոսի նստավայրը համարվող Կաթողիկե և Սուրբ Աննա եկեղեցիների բակում։

Մայր Աթոռ Սուրբ Էջմիածնում հունիսի 8-ին տեղի է ունեցել եպիսկոպոսաց ժողով, որից հետո հոգևորականները հայտարարություն են տարածել։ Նրանք նշել են` անընդունելի է մտահոգությունների վերջնագրային ոճը, որ ներկայացվում է Ամենայն Հայոց Կաթողիկոսին՝ առաջադրված պահանջի տեսքով: Եպիսկոպոսաց դասը, իբրև հիմնական երաշխավոր Հայ Եկեղեցու կանոնական կարգի և Ամենայն Հայոց Կաթողիկոսի հանգամանքի անձեռնմխելիության, հաստատել է, որ կաթողիկոսի հրաժարականը՝ արտաքին և բռնի միջամտության միջոցով պարտադրված, հակականոնական է, ուստի և անվավեր: