Գործարար պատգամավորների հրաժարականները ՀՀԿ փոխնախագահ Արմեն Աշոտյանը դիտարկում է քաղաքական հետապնդումների համատեքստում։ Այս մասին նա այսօր հայտնել է լրագրողների հետ զրույցում` հիշեցնելով, որ հեղափոխության առաջին իսկ օրերից ինքը նման մտավախություն հայտնել էր։
«Քաղաքական հետապնդումներն այսօր փորձում են քողարկել արդարադատության գործընթացով, բայց ես ուզում եմ հատուկ շեշտել, որ կա ընտրողական արդարության միտում, և դրա կիրառումը չի նպաստելու հեղափոխության ժամանակ հնչեցված նպատակների իրագործմանը»,– ասել է Աշոտյանը։
Նրա խոսքով` պետական տարբեր ատյանների գործողություններն այսօր իրականացվում են քաղաքական մոտիվներով։
Ինչ վերաբերում է ՀՀԿ խմբակցությանը, Արմեն Աշոտյանը վստահեցնում է, որ անկախ քաղաքական գործընթացներից ՀՀԿ–ն «պահպանում է միասնականությունը և փորձում ներկայանալ որպես միասնական քաղաքական միավոր»։
Արմեն Աշոտյանը չի բացառում նաև, որ խմբակցությունից հրաժարականների գործընթացը կշարունակվի, բայց ոչ մեծ ծավալով։