ԵՐԵՎԱՆ, 31 մայիսի — Sputnik. Բնապահպանության նորանշանակ նախարար Էրիկ Գրիգորյանը հերքում է բնապահպանների մեղադրանքները, թե ինքը «Լիդիան Արմենիա» ընկերության ներկայացուցիչն է կառավարությունում։ Այս մասին նախարարը հայտարարեց ԱԺ-ում լրագրողների հետ զրույցում։
«Ի՞նչ է նշանակում «Լիդիանի» ներկայացուցիչ, ես կառավարության ներկայացուցիչն եմ, աշխատում եմ ՀՀ կառավարությունում։ Չեմ պատկերացնում մարդու, որը աշխատելով կառավարությունում` պետք է լինի ինչ-որ մեկի ներկայացուցիչը, ներկայացնի ինչ-որ մեկի շահերը։ Ես անում եմ իմ գործը։ Կրկին շեշտում եմ՝ եթե որևէ կաշկանդվածություն ունենայի ինչ-որ խմբից, կազմից, մարդկանցից, չէի ստանձնի այս աշխատանքը»,- ասաց նախարարը` հավելելով, որ որևէ մեկից ինչ-որ հարցում կաշկանդվածություն չի ունեցել և չունի։
Ինչ վերաբերում է Ամուլսարի հանքը շահագործելու վերաբերյալ իր դիրքորոշմանը, Էրիկ Գրիգորյանը հայտարարեց, որևէ առանձնահատուկ վերաբերմունք չկա և չի կարող լինել։
«2011թ-ից սկսած` իմ վերաբերմունքը չեմ փոխել։ Միշտ ասել եմ նույն բանը. որպես մասնագետ և բնապահպան` կարծում եմ, որ հանքարդյունաբերության այս ծավալների զարգացումը Հայաստանում ճիշտ չէ, որովհետև Հայաստանը կենսաբազմազանության առումով աշխարհի կարևոր վայրերից մեկն է, ու սրանք ուղղակի խոսքեր չեն։ Ես անձամբ կարծում եմ, որ Հայաստանի զարգացման ուղղությունն ավելի շատ պետք է լինի գիտական, ՏՏ ոլորտի զարգացման, սակայն կան գործընթացներ, որոնք սկսվել են նախկինում և այնտեղ կան իրավունքի հետ կապված հարցեր»,-ասաց բնապահպանության նախարարը։
Գրիգորյանը հիշեցրեց, որ «Ամուլսարի» հանքի շահագործման փորձաքննությունը դրական եզրակացություն է ստացել դեռ 2009 թվականից սկսած, մինչդեռ, նրա խոսքով, դրական եզրակացություն չի կարող լինել, եթե համայնքը դրական եզրակացություն չի տվել։
«Իրենք կարող են տալ, հետո փոշմանել։ Ես փորձում եմ տարանջատել իրավական գործընթացները բովանդակայինից։ Բովանդակայինը իմ անձնական կարծիքն է, թե ինչ ուղի եմ տեսնում Հայաստանի զարգացման համար։ Իրավական գործընթացների հետ կապված ես հանքարդյունաբերության ոլորտում տեսնում եմ ռիսկեր»,- ասաց նախարարը։
Նրա խոսքով` հենց այդ ռիսկերի հետ են կապված նաև կառավարության նախաձեռնած ստուգումները Հայաստանի 28 հանքերում։