ԵՐԵՎԱՆ, 29 մայիսի — Sputnik.ՀՀ ոստիկանության նախկին պետ Վլադիմիր Գասպարյանի փեսան` ԱԺ «Հանրապետական» խմբակցության պատգամավոր Արթուր Գևորգյանը, հայտարարել է, որ իր դիմումի համաձայն` դուրս է գալիս Հայաստանի Հանրապետական կուսակցությունից, միաժամանակ դուրս է գալիս ԱԺ Հանրապետական խմբակցությունից, սակայն չի հրաժարվում պատգամավորի իր մանդատից:
Հայտարարությունը ԱԺ պատգամավորը տարածել է ֆեյսբուքյան իր էջում:
Նա դիմել է բոլոր նրանց, ովքեր իրեն գործուղել են Ազգային ժողով։
«Տեղեկացնում եմ Ձեզ, որ դիմումիս համաձայն դուրս եմ գալիս Հայաստանի Հանրապետական Կուսակցությունից: Միաժամանակ մեկ այլ դիմումով դուրս եմ գալիս ԱԺ Հանրապետական խմբակցությունից»,- գրել է նա:
Պատգամավորը նշել է, որ իր այս քայլը հետապնդում է մի քանի հիմնական նպատակ։
«Նպաստել խորհրդարանում լարվածության նվազմանը, ստեղծված քաղաքական ճգնաժամի լուծումը պետք չէ թողնել միայն արտահերթ ընտրություններին: Առավել ևս, երբ դեռ հայտնի չէ, թե երբ է հնարավոր այն իրականացնել, և հայտնի չէ՝ ինչ պրոցեսներ կնախորդեն և ինչ զարգացումներ կունենանք վերջնարդյունքում»,- գրել է Գևորգյանը:
Պատգամավորը ճիշտ է համարում աշխատանքի էֆեկտիվությունը բարձրացնելու նպատակով կառավարությանը տալ գործելու ավելի խաղաղ եւ կանխատեսելի պայմաններ:
«Նման քայլով հնարավորություն կտանք նորաստեղծ, այո, նաև անփորձ կառավարությանը կենտրոնանալ իր անելիքների շուրջ: Սա բխում է մեր ազգային շահից, և երկրորդ՝ նման քայլով նրանց հնարավորություն չենք տա արդարանալ անբավարար արդյունքների դեպքում: Պետք է տալ հնարավորություն և պահանջել, այլ ոչ թե խանգարել, հետո մեղադրել…»,- նշել է նա։
Գևորգյանի խոսքով` մի բան հստակ է՝ ցանկացած պարագայում ընկնում ենք տեմպից, կորցնում ենք ժամանակ, այն, ինչ ամենաթանկն է:
«Եվ քանի որ պատգամավոր եմ ընտրվել ռեյտինգային կարգով, այս քայլը կատարելիս թիկունքումս զգում եմ բազմահազարանոց ընտրողների աջակցությունը»,- գրել է նա:
Արթուր Գևորգյանը պատգամավոր է ընտրվել ռեյտինգային կարգով թիվ 2 ընտրատարածքից: