ԵՐԵՎԱՆ, 27 մայիսի — Sputnik, Արմենուհի Մխոյան. «Շիրակ» ֆուտբոլային ակումբի երկրպագուները առավոտ 11:30-ից ավելի քան 2 ժամ փակել էին Գյումրի-Երևան մայրուղին՝ պահանջելով Հայաստանի ֆուտբոլի ֆեդերացիայի նախագահ Ռուբեն Հայրապետյանի հրաժարականը։
Երկրպագուները Հայրապետյանից պահանջում են կատարել Երևան քաղաքի ընդհանուր իրավասության դատարանի որոշումը (դատավոր` Ռ. Վարդազարյան), համաձայն որի` հայցի ապահովման կարգով (այսինքն` ժամանակավորապես` մինչև արբիտրաժային կարգով վեճի վերջնական լուծումը) արգելվել է նվազեցնել, «Շիրակ» միավորները: Հենց այս միավորներն էլ զրկեցին «Շիրակին»ն չեմպիոնական տիտղոսից և նա գրավելով 4-րդ հորիզոնականը:
Մոտ 2 ժամ ճանապարհը փակելուց հետո, ֆան ակումբի որոշմամբ երկրպագուները բացեցին ճանապարհը, բայց ավելի ուշ փակեցին Գյումրու Թատերական հրապարակ տանող հատվածը: Նրանք հավատացնում են, որ պատրաստ են նաև ոտքով շարժվել Երևան և հանդիպել Ռուբեն Հայրապետյանի հետ՝ պարզելու ինչու վերջինս, հաշվի չառնելով դատարանի որոշումը, միավորները վերցրեց թիմից:
Ռուբեն Հայրապետյանի գլխավորած Հայաստանի ֆուտբոլի ֆեդերացիան հրապարակեց ՈՒԵՖԱ-ի նամակը «Շիրակի»՝ «Բանանցի» հետ պայմանավորված հանդիպում անցկացնելու վերաբերյալ: Ըստ ՀՖՖ-ի՝ ՈՒԵՖԱ-ն վարույթ է սկսել «Շիրակի» դեմ և լիակատար աջակցություն է հայտնել հայաստանյան թիվ մեկ ֆուտբոլային կառույցին արատավոր երևույթները կանխելու համար:
ՀՖՖ-ի կողմից հրապարակված նամակը ոչ միանշանակ արձագանք է ստացել, հատկապես` գյումրեցի երկրպագուների շարքերում: Երկրպագուների մեջ տարակուսանք է առաջացրել այն հանգամանքը, որ ՀՖՖ-ն առաջին անգամ է հրապարակում ՈՒԵՖԱ-ի դիրքորոշումը: Վերջին շրջանում մեր երկրում բազմաթիվ են եղել պայմանավորված խաղի դրսևորումներ, որոնց վերաբերյալ ՈՒԵՖԱ-ն հանդես է եկել պաշտոնական զեկույցներով: Այդ զեկույցները, սակայն, տեղ չեն գտել ՀՖՖ-ի պաշտոնական կայքում: