ԵՐԵՎԱՆ, 25 մայիսի — Sputnik, Անի Լիպարիտյան. Հայաստանի կենդանապաշտպանները արդեն որերորդ տարին է` ահազանգում են` բողոքելով շների ստերջացմամբ զբաղվող «Յունիգրաֆ-իքս» ընկերության գործունեության դեմ։ «Յունիգրաֆ-իքս»-ի ժամը կարծես թե վրա հասավ. ոստիկանությունը հայտարարեց, որ ընկերությանը կասկածում են փողերի լվացման համար։
Ոստիկանության հաղորդագրության մեջ նշվում է, որ 2009 թվականից ի վեր ամեն տարի քաղաքապետարանի հայտարարած մրցույթին մասնակցել և հաղթել է նույն ընկերությունը՝ «Յունիգրաֆ-Իքսը»՝ ստանալով տարեկան մոտ 100 միլիոն դրամ, որը հիմնականում ծախսվել է ոչ թե նշված նպատակների համար, այլ, ըստ ամենայնի, յուրացվել է։
Sputnik Արմենիան կապ հաստատեց «Յունիգրաֆ-իքս»-ի հետ, բայց ընկերության մեկնաբանությունները բավարար չէին։ Այնտեղից հայտնեցին, որ գործը դեռ ոստիկանությունում է, և իրենք չեն կարող և պարտավոր չեն որևէ բան մեկնաբանել։
«Որևէ բան մեկնաբանելու իմաստ չենք տեսնում։ Պատասխանի կամ հակափաստարկի մասին խոսք լինել չի կարող, քանի դեռ գործը ոստիկանությունում է», — նշեցին ընկերության ներկայացուցիչները։
Համակարգի դեմ
Իրավապահները պարզել են, որ 2016-2018 թվականներին վերոնշյալ ընկերությունը քաղաքապետարանից շուրջ 267 մլն դրամ է ստացել։
«Դինգո թիմ» ՀԿ-ի համակարգող Գոհար Մանուշակյանը Sputnik Արմենիայի հետ զրույցում նշեց, որ իր գործընկերների հետ արդեն մի քանի տարի շարունակ ցույցեր է կազմակերպում «Յունիգրաֆ-իքս»-ի գործունեության դեմ։
«Մի քանի տարի առաջ մենք լրագրողների ներկայությամբ ստերջացրել էինք շներին, որոնք սարսափելի վատ վիճակում էին։ Հանրային վիրահատություն էր։ Մենք զբաղվեցինք այն շներով, որոնց իբր ստերջացրել էր «Յունիգրաֆ-իքսը»։ Սակայն էգը հղի էր, այսինքն նրանք փորը պարզապես ճղել ու կարել էին, ստերջացում չէր արվել», — ասաց նա։
Մանուշակյանի խոսքով` «Յունիգրաֆ-իքս»-ում նույնիսկ հայտնել էին, որ կարողացել են մեկ տարվա ընթացքում 43 հազար շուն բռնել` ակնհայտ է, որ այս թիվն իրականությանը չէր կարող համապատասխանել։ Մանուշակյանի խոսքով` Երևանում այդքան շուն չի կարող լինել, և հետո աշխատանքների նման ծավալը ենթադրում է, որ ամեն օր ստերջացվել են մինչև 2000 շուն։ Իսկ դրա համար առնվազն 100 անասնաբույժ պետք է քրտնաջան աշխատեին։
«Իսկ նրանք ընդամենը 2-3 անասնաբույժ ունեն», — նշեց Sputnik Արմենիայի զրուցակիցը։
Ո՞ւր են գնացել գումարները
«Յունիգրաֆ-իքս» ՍՊԸ-ն, որը գտնվում է Երևանի քաղաքապետարանի աշխատակազմի առևտրի և սպասարկումների վարչության հսկողության տակ, հասցրել է վատ համբավ ունեցող ընկերության կարգավիճակ ստանալ։
Ոստիկանությունը պարզել է, որ ընկերությունը ձևակերպել է, թե ձեռք է բերել 128 տոննա հավի միս, մինչդեռ նախապատրաստված նյութերով պարզվել է, որ փաստացի օգտագործվել է 12,6 տոննա: Ձևակերպվել է 206 տոննա բրնձի ձեռք բերում, պարզվել է, որ փաստացի օգտագործվել է 8,4 տոննա: Իսկ ձևակերպված 25 տոննա խոզի միս ընդհանրապես չի օգտագործվել: Արդյունքում յուրացվել է շուրջ 185 միլիոն դրամ:
ԶԼՄ-ներում և սոցցանցերում լուրեր են շրջանառվում, որ ընկերության ղեկավարները մսխում էին քաղաքապետարանի տրամադրած միջոցները` անշարժ գույք և թանկարժեք ավտոմեքենաներ գնելով։
«Մենք ինքներս ենք քաղաքապետարանին առաջարկել թափառող շների զանգվածային ստերջացում իրականացնել։ Հայաստան են ժամանել միջազգային կազմակերպության ներկայացուցիչներ, ստերջացրել և ամորձատել են շուրջ 120 շուն, (քաղաքապետ) Տարոն Մարգարյանի հետ համաձայնագիր են ստորագրել, որի համաձայն` այդ շներին ոչ ոք ձեռք չի տա։ Սակայն մեկ շաբաթվա ընթացքում «Յունիգրաֆ-իքս» ընկերությունը այդ շների մեկ երրորդին սպանել է», — պատմեց Մանուշակյանը։
Պրոֆեսիոնալներից կազմված թիմի ներկայացուցիչներին Հայաստան հրավիրելու փորձերը կրկին անհաջողության են մատնվել։ Մեր զրուցակցի խոսքով` անվճար իրենց գործն անող մասնագետները չեն կարողացել ժամանել և ստերջացնել շներին, քանի որ Երևանի քաղաքապետարանը համաձայնություն չի հայտնել։