ԵՐԵՎԱՆ, 22 մայիսի —Sputnik. Ղարաբաղյան հակամարտության գոտում ռազմական գործողություններ կարող են սկսվել 2019 թ-ի գարնանը: Sputnik Արմենիայի մամուլի կենտրոնում հրավիրված ասուլիսի ժամանակ այս կանխատեսումն արեց Հայաստանի Դեմոկրատական կուսակցության նախագահ Արամ Սարգսյանը:
Նրա խոսքով` Հայաստանի կառավարությունը խաղաղ պայմաններում աշխատելու համար մեկ տարի ունի: Այս ժամանակահատվածում անհրաժեշտ է ուժեղացնել պաշտպանական ներուժը, լուրջ արդյունքների հասնել տնտեսության և պետական կառավարման ոլորտներում:
«Թուրք-ադրբեջանական տանդեմը տարածաշրջանում իր աշխարհաքաղաքական հավակնություններից չի հրաժարվել։ Մի շարք հանգամանքներ կան, որոնք առիթ են տալիս ենթադրելու, որ ռազմական գործողություններ կարող են սկսվել արդեն հաջորդ տարվա գարնանը: Ադրբեջանի նախագահ Իլհամ Ալիևի` Նախիջևան կատարած այցի ժամանակ հնչեցրած հայտարարություններն ու նրա սպառնալիքները սպասվող արկածախնդրության մասին ազդանշան են», — նշեց Սարգսյանը:
Անկարան Նախիջևանը դիտարկում է որպես կարևորագույն պլացդարմ թուրքական աշխարհը միավորելու համար, այդ ինքնավար տարածքում է գտնվում Թուրքիայի Էքսպեդիցիոն կորպուսը, այնտեղ է տեղակայված նաև Ադրբեջանի համազորային բանակը, որը զինված է այդ թվում նաև «Տոչկա-Ու» և թուրքական «Kasirga» օպերատիվ- մարտավարական հրթիռներով:
Ինչո՞ւ հենց մեկ տարի հետո: Քաղաքական գործչի կարծիքով` առաջիկա ամիսներին այնպիսի իրադարձություններ տեղի կունենան, որոնք Թուրքիայի և Բաքվի համար անհնարին և աննպատակահարմար կդարձնեն ղարաբաղյան գոտու իրավիճակի սրացումը։
Այսպես օրինակ, հունիսին Թուրքիայում նախագահական ընտրություններ են լինելու, հետո Էրդողանը մտադիր է շարունակել Սիրիայում քրդերի դեմ գործողությունները: Եվ այդ ընթացքում նա ժամանակ չի ունենա զբաղվելու Հարավային Կովկասով: Բացի այդ, մեկ այլ գործոն էլ կա` Հայաստանում իշխանություն ձևավորելու գործընթացը, արտահերթ ընտրությունների անցկացումը: Բացի այդ, զսպող գործոն է նաև Հայաստանում հոկտեմբերին կայանալիք ֆրանկոֆոնիայի գագաթնաժողովը:
Սարգսյանի համար ակնհայտ է նաև, որ Բաքուն ռազմական գործողությունները չի վերսկսի նաև ձմռանը: Բացի այդ, Բաքուն այս ամիսների ընթացքում սպասելու է` փորձելով նման «համբերատարությունը» ներկայացնել որպես դիվանագիտական հաղթաթուղթ:
Հայկական կողմը պետք է առավելագույն զգոնություն դրսևորի: Երևանը բոլոր հնարավոր մակարդակներում պետք է մշտապես հիշեցնի, որ Ադրբեջանի ցանկացած արկածախնդրություն հղի է Բաքվին ուղղված հարվածներով: Հայաստանը դրա համար բոլոր միջոցներն ու հնարավորությունները ունի, և, ըստ Սարգսյանի, ամեն անգամ պետք է բարձրաձայն ասել այդ մասին։