ԵՐԵՎԱՆ, 15 մայիսի — Sputnik. Նոր նախարարները չպետք է հիասթափեցնեն ժողովրդին, սա է գլխավոր պահանջը, Sputnik Արմենիայի թղթակցի հետ զրույցում ասաց վարչապետ Նիկոլ Փաշինյանը՝ պատասխանելով հարցին, թե ինչ սպասումներ ունի կառավարությունից։
Վարչապետի հետ հաջողվեց զրուցել կառավարության շենքի դիմաց։ Նա անցնում էր նախարարությունից նախարարություն և հերթով ներկայացնում նոր ղեկավարներին։
Հիշեցնենք, որ նոր կառավարությունը վերջնականապես ձևավորվեց մայիսի 12-ին։ Սա Հայաստանի պատմության ամենաերիտասարդ կառավարությունն է։
«Նախարարների նոր կաբինետի հարցում գլխավոր սպասումն այն է, որ նրանք չհիասթափեցնեն ժողովրդին», — ասաց Փաշինյանը։
Նրա կարծիքով՝ նոր նախարարները պետք է ամենայն պատասխանատվությամբ ծառայեն Հայաստանին ու երկրի քաղաքացիներին։
Ինչ վերաբերում է ԵԱՏՄ գագաթնաժողով կատարած այցին, վարչապետն ընդգծեց, որ բոլոր սպասումներն արդարացել են։
ԵԱՏՄ գագաթնաժողովը կայացել է մայիսի 14-ին, այն առաջինն է եղել Հայաստանի նոր վարչապետ Նիկոլ Փաշինյանի համար։