ԵՐԵՎԱՆ, 14 մայիսի — Sputnik. ՀՀ ԱԺ նախագահ Արա Բաբլոյանն այսօր արձանագրություններ է ստորագրել ՀՀ ԱԺ պատգամավոր Արարատ Միրզոյանի, Մանե Թանդիլյանի, Արտակ Զեյնալյանի պատգամավորական լիազորությունները դադարեցնելու մասին։ Մինչ այդ դադարեցվել էին նաև վարչապետ նշանակված Նիկոլ Փաշինյանի լիազորությունները։
«Ելք» խմբակցության 9 պատգամավորներից Ազգային ժողովում մնացել են 5-ը, որոնցից 2-ը «Քաղաքացիական պայմանագիր» կուսակցության անդամներ են, 2-ը` «Լուսավոր Հայաստանի», 1-ը` «Հանրապետություն» կուսակցության։ «Ելքի» մյուս 4 պատգամավորները, այդ թվում խմբակցության ղեկավար Նիկոլ Փաշինյանն այսուհետ կաշխատեն գործադիր իշխանությունում։
Կառավարություն տեղափոխվածներին առաջիկայում կփոխարինեն նոր պատգամավորներ: «Ելք» դաշինքն առայժմ պաշտոնական հայտարարություն չի արել նոր պատգամավորների մասին, բայց դատելով 2017թ-ի խորհրդարանական ընտրություններում դաշինքի անդամների ստացած ձայներից` կարելի է ենթադրել, թե Ազգային ժողովից հեռացած գործընկերների փոխարեն ովքեր ներկա կլինեն խորհրդարանի առաջիկա նիստին։
Խմբակցության նախկին ղեկավար Նիկոլ Փաշինյանին, թերևս, կփոխարինի Երևանի ավագանու անդամ Ալեն Սիմոնյանը։ Փաշինյանը 2017թ.-ին պատգամավոր է ընտրվել Երևանի Կենտրոն, Նորք Մարաշ, Էրեբունի, Նուբարաշեն վարչական շրջաններն ընդգրկող 4-րդ ընտրատարածքից` համամասնական ցուցակով։ Ձայների քանակով նրան հաջորդում է Ալեն Սիմոնյանը։
«Ելք» խմբակցության նախկին պատգամավոր Արարատ Միրզոյանը, որն առաջին փոխվարչապետ է նշանակվել, ընտրվել էր Երևանի Մալաթիա Սեբաստիա և Շենգավիթ վարչական շրջաններն ընդգրկող 3-րդ ընտրատարածքից։ Ստացած ձայների քանակով Միրզոյանին նույն ընտրատարածքում հաջորդում է Արայիկ Հարությունյանը։
Բայց քանի որ նա էլ կրթության և գիտության նախարար է նշանակվել, խորհրդարան, ամենայն հավանականությամբ, կգա այդ ընտրատարածքում 3-րդ հորիզոնականը զբաղեցնող Հրաչյա Հակոբյանը: ԶԼՄ-ների տեղեկություններով` նա վարչապետ Նիկոլ Փաշինյանի կնոջ եղբայրն է։
ՀՀ աշխատանքի և սոցիալական հարցերի նախարար նշանակված նախկին պատգամավոր Մանե Թանդիլյանին էլ ամենայն հավանականությամբ կփոխարինի Երևանի Ավան, Նոր Նորք, Քանաքեռ-Զեյթուն վարչական շրջանների 1-ին ընտրատարածքում «Ելք» դաշինքի ցուցակով Թանդիլյանից հետո ամենաշատ ձայներ հավաքած «Քաղաքացիական պայմանագիր» կուսակցության անդամ Հովիկ Աղազարյանը։
Դե իսկ ՀՀ արդարադատության նախարար դարձած Արտակ Զեյնալյանին կարող է փոխարինել «Լուսավոր Հայաստան» կուսակցության անդամ Հայկ Կոնջորյանը, որը ձայների հաշվարկով այս ընտրատարածքում երրորդն է։ Նրան նախորդող Լենա Նազարյանն արդեն իսկ խորհրդարանում է։
Ինչպես արդեն հայտնել ենք, խորհրդարանից հեռանալու դիմումներ են ներկայացրել նաև ՀՀԿ և ՀՅԴ խմբակցությունների պատգամավորներ։
Առաջինը` մայիսի 1-ին մանդատից հրաժարվել էր ՀՀԿ խմբակցությունից Գրիգոր Ավալյանը, որը չէր ներկայացել վարչապետի պաշտոնում Նիկոլ Փաշինյանի թեկնածության ընտրության նիստին։ Նրան ամենայն հավանականությամբ կփոխարինի ռեյտինգային ընտրակարգով Տավուշի մարզում ստացած քվեներով զիջած գործարար Հակոբ Հակոբյանը։ Նա հանրությանն առավել հայտնի է որպես Երևանի և Դիլիջանի գարեջրի գործարանների սեփականատեր, պատգամավոր է եղել նախորդ գումարման ԱԺ-ում։
ՀՅԴ խմբակցության պատգամավորներից մանդատը վայր են դրել Աղվան Վարդանյանն ու Արմեն Բաբայանը։ ՀՅԴ-ն արդեն որոշել է`Վարդանյանի փոխարեն ԱԺ կգա նախկին պատգամավոր Ռուզան Առաքելյանը, Բաբայանին` նախկին պատգամավոր ու նախկին ԿԳ նախարար Սպարտակ Սեյրանյանը։
ԱԺ առաջիկա նիստը նախատեսված է հաջորդ շաբաթ` մայիսի 22-ից 25-ը։