ԵՐԵՎԱՆ, 12 մայիսի —Sputnik. ՀՀ կառավարությունում ներգրավված երիտասարդները պետք է Նիկոլ Փաշինյանին օգնեն պահպանել վարկանիշը մինչև ԱԺ արտահերթ ընտրությունների անցկացումը, Sputnik Արմենիային ասաց քաղտեխնոլոգ Վիգեն Հակոբյանը։
Նշենք, որ նախագահի հրամանագրով և վարչապետի առաջարկով նոր նշանակումներ են եղել,մասնավորապես նշանակվել են երկու փոխվարչապետներ, պաշտպանության, կրթության, սփյուռքի, տարածքային կառավարման և զարգացման նոր նախարարները։ Նրանք բոլորը, բացի պաշտպանության նախարարից, Փաշինյանի կուսակիցներն են, բողոքի շարժման ակտիվ մասնակիցները։
«Հաշվի առնելով, որ այս կառավարությունը ժամանակավոր է համարվում, թիմն այս փուլում պետք է կոնկրետ խնդիրներ լուծի մինչև արտահերթ ընտրությունները։ Ներկա պահին Փաշինյանը, ըստ ամենայնի, հույսը դնում է ոչ թե երկարաժամկետ հեռանկարի, այլ ժամանակավոր կառավարման վրա», — ասաց Հակոբյանը։
Նրա խոսքով` որոշվելու են նոր կառավարության երկու հիմնական գործառույթները։ Առաջինը ընտրություններին նախապատրաստվելն է, մասնավորապես` օրենսդրության փոփոխումը։
Երկրորդը` պետք է փորձեն այնպես աշխատել, որ Փաշինյանի և նրա թիմի վարկանիշը հնարավորինս քիչ նվազի։
«Կառավարության վարկանիշի կորուստը Հայաստանի նման երկրներում, որտեղ չկան լուրջ խնդիրներ չունեցող ոլորտներ (ինչով էլ պայմանավորված էին բողոքները), անխուսափելի է։ Խնդիրն այդ կորուստը նվազագույնի հասցնելն է` ընտրություններին լավ արդյունք ցույց տալու համար», — ասաց Հակոբյանը։
Նրա կարծիքով` առայժմ դժվար է ասել, թե կառավարության նորանշանակ անդամներն ու նախարարներն ինչպես կղեկավարեն իրենց գերատեսչությունները։ Նրանք երիտասարդ, կրթված մարդիկ են, բայց կա՛մ քիչ փորձ ունեն, կա՛մ էլ կառավարման փորձ չունեն։
Արդեն հայտնի է, որ առաջին փոխվարչապետի պաշտոնը զբաղեցրել է «Ելք» խմբակցության պատգամավոր Արարատ Միրզոյանը, փոխվարչապետ է դարձել «Քաղաքացիական պայմանագիր» կուսակցության մամուլի քարտուղար Տիգրան Ավինյանը։
Կրթության նախարար է նշանակվել Երևանի ավագանու անդամ Արայիկ Հարությունյանը, Տարածքային կառավարման և զարգացման նախարար` Սուրեն Պապիկյանը, Սփյուռքի նախարար` թուրքագետ Մխիթար Հայրապետյանը։
Վարչապետ Նիկոլ Փաշինյանը պաշտպանության նախարար է ընտրել անկուսակցական Դավիթ Տոնոյանին, որը ղեկավարում էր ԱԻՆ-ը։