ԵՐԵՎԱՆ, 11 մայիսի — Sputnik. Բրիտանական Football.London պարբերականը «Ալեգրիի, Մավրոպանոսի հետ կապված իրավիճակը և «Մանչեսթեր Յունայթեդի» Մեծ կորուստը» վերնագրով սյունակում գրում է «զինագործների» կիսապաշտպան, Հայաստանի հավաքականի ավագ Հենրիխ Մխիթարյանի մասին։ Նրա տրանսֆերը «Արսենալ» պարբերականը կապում է «մեծ բիզնեսի» հետ։
«Ամեն անգամ, երբ դուք տեսնում եք Հենրիխ Մխիթարյանի խաղը, հասկանում եք, որ հային հունվարին ձեռք բերելով, «Արսենալը» ուղղակի հիանալի գործարք է կնքել։ Հաշվի առնելով այն, որ «Արսենալը» հենց այնպես զրկվել է Ալեքսիս Սանչեսից, նրա փոխարեն Հենրիխ Մխիթարյանի մակարդակի խաղացող ձեռք բերելը կողոպուտին հավասարազոր բան է», – գրում է պարբերականը։
Fotball.London–ը նշում է, որ Մխիթարյանը միշտ խաղի մեջ է։
«Նա մշտապես խաղ է որոնում և, թվում է, (այն ստանալով) նա կստիպի, որպեսզի ինչ–որ բան շարժվի տեղից», – ասվում է հոդվածում։
Fotball.London–ի գնահատականով` Մխիթարյանի տեխնիկան բացառիկ է, և նրան երբեք չի կարելի մեղադրել նրանում, թե «բացակայում է» դաշտից։
«Մեսութ Օզիլի մասին նույնը չես ասի», – եզրափակում է պարբերականը։
Հիշեցնենք, որ Հենրիխ Մխիթարյանն ընթացիկ տարվա հունվարին «Մանչեսթեր Յունայթեդից» տեղափոխվել է «Արսենալ»։