ԵՐԵՎԱՆ, 11 Մայիս — Sputnik. Անկասկած այս ըմբիշների ելույթները քննարկման ենթակա չեն: Երեք էլ շատ լավ են հանդես եկել ու մեդալ վաստակել։ Այս մասին այսօր ասաց Հունահռոմեական ոճի ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանը` խոսելով Եվրոպայի առաջնության արդյունքների մասին:
Հիշեցնենք, որ այս մրցաշարում Հայաստանի ըմբիշները նվաճեցին երկու ոսկե և մեկ բրոնզե մեդալ: Եվրոպայի առաջնություններում չորրորդ անգամ չեմպիոնի կոչումը նվաճեց Արթուր Ալեքսանյանը, Մաքսիմ Մանուկյանի համար հաղթանակը առաջինն էր հին աշխարհամասի առաջնություններում, Կարեն Ասլանյանն էլ դարձավ բրոնզե մեդալակիր:
«Երեք էլ շատ լավ են հանդես եկել ու մեդալ վաստակել, չնայած Կարեն Ասլանյանն անցկացրած իր գոտմարտերով ապացուցեց, որ ապագայում կարող է հասնել ավելի բարձր նվաճումների», – նշեց Լևոն Ջուլֆալակյանը: Մարզիչը գոհ էր նաև 60կգ և 63կգ քաշային կարգերում մեր հանրապետությունը ներկայացրած Արմեն Մելիքյանից ու Սլավիկ Գալստյանից:
«Երկու ըմբիշներն էլ ունեն մեծ ներուժ ու աշխատանքը ճիշտ կազմակերպելու դեպքում երկուսն էլ մոտ ապագայում կարող են հասնել մեծ հաջողությունների: Ե՛վ Մելիքյանը, և՛ Գալստյանը աշխատասեր ու նպատակասլաց ըմբիշներ են, ես նրանց հետ մեծ հույսեր եմ կապում»,– ավելացրեց Լևոն Ջուլֆալակյանը:
Հավաքականի մարզիչը գոհ էր նաև Արթուր Շահինյանի անցկացրած գոտեմարտերից: 87 կգ քաշային կարգում հայ ըմբիշը դարձավ մրցավարության «զոհ» ու չկարողացավ հասնել մինչև պատվո պատվանդան: Իսկ, ահա 77 կգ քաշային կարգում սպասելիքները մեծ էին Կարապետ Չալյանից, որը քառորդ եզրափակչում պարտվեց Շվեդիայի ներկայացուցչին ու դուրս մնաց մեդալների համար պայքարից:
Լևոն Ջուլֆալակյանը նշեց, որ Չալյանից արդեն երկար ժամանակ է ինչ արդյունք են սպասում, բայց ըմբիշը, հաղթողի հավակնորդների թվում լինելով, չի կարողանում հասնել արդյունքի: Այս քաշային կարգում մեր հավաքականում մեծ մրցակցություն կա, քանի որ Արսեն Ջուլֆալակյանն էլ է հանդես գալիս 77 կգ քաշայինների մեջ: Առաջիկայում մարզումների ու մրցումների միջոցով հավաքականի մարզիչը կկողմնորոշվի, թե ո՞վ կներկայացնի Հայաստանը առաջիկա մրցումներում:
Հունահռոմեական ոճի ըմբշամարտի Հայաստանի հավաքականի գլխավոր մարզիչը նշեց, որ արդեն հունիսի 10-ից թիմը ուսումնամարզական հավաք է անցկացնելու ու, մասնակցելով նաև մի քանի միջազգային մրցաշարերի, նախապատրաստվելու է աշխարհի առաջնությանը, որը կայանալու է 2018 թվականի հոկտեմբերի 22-28-ը Բուդապեշտում: